Зуслангийн өвөл буюу Карантилагдсан 2020

За юуны өмнө энэ постыг эхлэхдээ дуулгах сонин бол "бүл нэмсээн". Туркэд unplanned Valentine's day-г арай хэтрүүлэн тэмдэглэсэн бололтой юм, 9 сарын дараа 3 дахь хүүхдээ өлгийдсөн байдаг юм. Хэдийгээр 28 насандаа хүнтэй сууж, 2 ихэр хүүхэдтэй болох төлөвлөгөө бүтээгүй ч 5 жилийн дотор 3 хүүхэд гээд чамгүй ажил амжуулчихсан л сууж байна даа.
Дундах хүүхэд дээр барьж эхэлсэн зуслангийн байшингаа энэ өвөл яаж ч байсан ашиглалтанд оруулна гээд зүтгэсээр байгаад 12 сард дуусгаад шинэ маамаагаа аваад зуслан дээр өвөлжихөөр болов оо. Тэгээд шинэ маамаа зуслан дээр ирээд 2 долоо хоноогүй байхад ах эгч нарын цэцэрлэг карантилагдаад бүгдээрээ бөөнөөрөө зуслан дээрээ амьдарч эхэлсэн. Дээрээс нь өвөө эмээ, дүү нарын хүүхдүүд гээд гэр цэцэрлэг... гэр цэцэрлэгийн багш нь, тогооч нь, үйлчлэгч, цэвэрлэгч нь хэн байсан нь ойлгомжтой биз дээ.. за яахуу яахуу.. ямар азаар байшингаа ашиглалтанд оруулж амжсан байсан юм гээл баярлаад сууж байлаа. Зуслан дээр хөл хорионд байх санхүүд хэмнэлттэй, хүүхдүүдэд тустай, хамгийн зөв зүйл юм байна. Шинэ маамаад бол тэгээл цэвэр агаар эм гэдэг л үнэн юм байна. Өдөржин гадаа унтаад, шөнөжин бараг сэрэх ч үгүй унтана. Идэхээсээ илүү л унтана. Туркууд хүүхдээ "uyusun da büyüsün" буюу "унтаад том болоорой" гэж бүүвэйлдэг нь ийм учиртай байсан юм байна шд.
За тэгээд карантиний үед хүүхдүүд хичээлээ хийж, гадаа тоглож, чаргаар гулгаж өнжинө. Харин томчууд нь өдөржин шөнөжин хөзөр тоглосон. Уйднаа л гэж байхгүй, бүр хөршийн хүмүүсээ дуудаж авчраад л тоглосон. Би бол муушиг гэдэг тоглоомыг мэддэггүй л байсан, одоо сурсаан сурсан хэхэ.
Энэ өвөл уг нь шинэ хүнээ өсгөөд зусландаа даруухан өвөлжинө, хүүхдээ унтуулаад нар туссан цонхон дээрээ суугаад ном уншина гээд баахан шинэ ном авч тавиад бэлдээд байсан байдгүй шүү. Шинэ мэргэжил эзэмшсээр байгаад таарлаа, цэцэрлэгийн багш гэдэг. 0-10 насны 6 хүүхэд.. өдрийн 90%-ийг хоол хийгээд, аяга таваг угаагаад, гэр цэвэрлэж өнгөрөөсөн. Бүх ажлаа дуусгаад яг 3-4 цагийн үед надад нэг 20-30мин чөлөөт цаг олддог юм байна лээ. Энэ цагт жоохнууд нь унтаж, том хүүхдүүд нь хичээлээ хийж таардаг юм. Энэ алтан хормыг ашиглаад аяга кофе хийж аваад ном бариад эсвэл суваг эргүүлж түр амсхийдэг. Гэхдээ бас бодоод байхад ийм busy хэрнээ ядарсан юм бол байхгүй ээ. Энэ байдалд дуртай, төвөгшөөхгүй харин ч кайф авсан.
2020 он ийм жил болно гэж төсөөлсөнгүй шүү, гүйэ тэгээд хэн ч л ийм юм болно гэж төсөөлөх вэ дээ. Корона вирус гэх энэ гайт өвчин тархаж дэлхий даяар хөл хорионд оруулчихна гэж хэн таамаглах вэ дээ. Одоо ч 4 сар өнгөрчихөөд байхад байдал намдах нь битгий хэл хүндэрсээр л байна. Энэ янзаар бол хэзээ эргээд хэвэндээ орох бол оо, ер нь хэвэндээ орох бол уу л гэж бодогдож байна. Бидний мэдэх амьдрал гэгчийг орвонгоор нь эргүүллээ дээ энэ гайхал вирус. Олоон жилийн дараа энэ талаар бид юу ярьж, түүх юу бичиж байх болоо? Ямар ч байсан амьдрал өмнөх шигээ үргэлжлэхгүй л байх. Хүүхдүүдээ аваад гадуур гардаг, тоглоомын төв, хүүхдийн парк ордог байсан үеийг санаж байна, hot pot эсвэл сайхан солонгос хоолны газар орохыг санаж байна. Cinema-д кино үзэхийг санаж байна. Хэзээ эргээд айдас хүйдэсгүйгээр энэ бүгдийг хийх бол, тэр цаг мөчийг хүлээж байна.
Ингээд эргээд бодоход бид ямар их цаг ба мөнгийг гадуур гарах, зугаа цэнгэл, худалдан авалтанд үрдэг байсан байнаа, тиймээ. Энэ магадгүй амьдрал бидэнд хүчээр олгосон "pause" байх. Pause авчихлаа, одоо хэзээ play дарж болох вэ..

An unplanned Valentine's day trip to Istanbul

Үзэсгэлэнт Босфорын хоолой, далай үнэртэх шиг, цахлайн дуу сонсогдох шиг

Хамгийн сүүлийн пост 2015 онд гэнэ үү, блогоо бүр мартсан байна шүү. 2 хүүхэд, 2 том төслийн ард ч блог бичих зав гардаггүй юм байна. Одоо чадвал хааяа салхи оруулж байнаа...

Энэ хосуудын баяраар гэнэтийн явдал болж Станбул хот руу хэд хоног зугаалах завшаан тохиов. 2012 онд Туркэд тойрон аялал хийснээс хойш 7 жилийн дараа анх удаагаа очлоо. Хуучны дурсамж сэргээд үнэхээрийн сайхан байв. Өмнө нь оюутан статустай явдаг байсан бол энэ удаа аялагч, шоппер статустай айн.. Султанахметийн хавиар буудалд буугаад, турист ресторанд ороод, том моллууд хэсч шоппинг хийгээл кк.

Султанахмет, Аяа Софиа хавиар хэслээ, Basilica Cistern (Yerebatan sarnici) буюу газар доорх усан сангийн байгууламж үзлээ. Энэ газарт хэд ч орсон уйдахгүй, байнга л үлгэрийн мэт мэдрэмж төрөх юмаа.

Медусийн толгой

Old city буюу Султанахметээс Галата гүүр хүртэл алхаж, Галата гүүрэн доор загасны ресторанд чухам үнэтэй өдрийн хоол идэж Валентин тэмдэглэв кк. Гэхдээ орчин, уур амьсгал, дүр зураг, загасны амт, хоолны амт, дарс, шар айраг гээд бүгд perfect байсан л да. It was worth its price.  

A modern transport through old city

Тэгээд л баахан хөлийнхөө улыг эргэж, шавай гэж байдаг бол ханахаар л дэлгүүр хэслээ. Bakirkoy дүүрэгт байдаг Marmara Forum гээд шоппинг молл бол тасарцан газар байнаа. Туркийн бараг бүх гайгүй брэндийн дэлгүүр, department store гээд сонголт арвин дээрээс нь хямдрал бол урамтай байна лээ. Турк гутал сайн болохоор гэр бүлээрээ баахан л гутал авлаа, ойрын 5,10 жилдээ болоод явчих байхаа кк. 2012 онд Турк явахдаа баахан гутал цуглуулж байсан, тэд нар одоо хүртэл сайнаараа л байгаа, тэгэхээр аргагүй л чанартай байгаад байна. 

Бас оюутан байхдаа Sahaflar гээд Cemberlitas-д байдаг мөнгөний захаар их явж цаг үрдэг байсанаа санаад мөнгөний зах орсон боловч кг, кг-аар зардаг газрууд нь хөөгөөд тухтай ч үзэж, тухтай ч юм сонгож авч чадсангүйээ кк. Оюутан байхад бас тэгээл хөөгдөөд явдаг байж билээ. Тэр зах дээрээ мөнгөн эдлэл нь сонголт арвин, үнэ хямд хэрнээ аргагүй л бөөний худалдаа болохоор кг, кг мөнгө, хайрцаг хайрцагаар зардаг газар юм аа. 

За тэгээд, өнгөрсөн 7 жилийн хугацаанд юу өөрчлөгдсөн байна гэж ажиглаль хийвэл: зам харилцаа, нийтийн тээвэр аргагүй сайн хөгжүүлжээ. Станбулын өнцөг булан бүрт, бүр Босфорын хоолой доогуураа хүртэл тунел хийн метро тависан байна. Гэхдээ нийтийн тээвэр их үнэтэй байна. Метронд 1 суухад 1500 төгрөг орчим, дамжин суухад энэний тал орчим юм уу даа. Тэгээд очингуутаа онгоцны буудлаас Станбул карт аваад цэнэглээд явчихвал амар юм байна лээ.

Нисэх буудлийн харуул хамгаалалтын ажилтан, пасспортны ажилтнаас эхлээд гадуур хаа сайгүй л толгойны алчууртай эмэгтэйчүүд ажиллаж харагдах нь сонин санагдав. Өмнө нь ийм хаалттай хүмүүс ийм нээлттэйгээр ажиллаж байдаггүй байсан юм. Эрдоганы AKP-ын нөлөөлөл аргагүй мэдрэгдэж байна.

Өнгөрсөн хугацаанд, ер нь амьдрал хэцүү байгаа бололтой хүмүүс нь нэлээд бухимдалтай болсон санагдав. Муухай ааштай, бухимдалтайгийн дээр популер туристик орнууд шиг л юм л бол мөнгө мөнгө болжээ. Юмны үнэ ч гэж явж өгчээ. Амьдрах өртөг өссөн нь гарцаагүй. 

Бусдаар бол цаг агаар сайхан, сэтгэлд хоногшсон Станбул үнэртээд үнэхээрийн сайхан байсаан. Хааяа ганц нэг бороо дусаад, зэврүүндүүхэн тэхдээ даарахааргүй, яг л миний мэдэх өвлийн улирал байлаа. Энэ удаа богино хугацаагаар явсан ч дурсамж сэргээд дахин дахин байн байн ирж баймаар санагдсан. Удахгүй дахиж уулзнаа Станбул!  

Зуны тухай товчхон буюу Увсад аялсан тэмдэглэл

Энэ зун гэр бүлээрээ алс холын Увс аймагт аялаад ирсэн. Увс аймаг чинь чухам хол газар байна лээ шд. Яваад байсан, яваад байсан дуусдаггүй. 3 хоног явж хүрсэн шүү дээ. Хүүхэд жоохон байсан болохоор их ядарсан. Хүүхэд ч, ээж нь ч ядардийн байна лээ хол газар олон хоног машинаар явахад. Хаширсан хоёр Увсад очингуутаа онгоцны тийз захиалаад буцахдаа шууд ниссэн.
Говийн хүүхдэд хойд зүг гэхээр л хангай санаанд ордог болохоор Увс аймгийг жинхэнэ хангай газар юм байх гэсэн чинь говь шиг газар байдийм даа. Үнэхээр гайхсан. Аймгийн төвдөө аймаар халуун, бороо орохгүй, тэгээд бас аймаар шороо шуурдаг. Улаангом гэдэг нэр чинь улаанаараа эргэлдсэн шороо гэдэгээс гаралтай гэсэн шд ккк. Увс явах замдаа бид Архангай, Чулуут гол, Тайхар чулуу, Хоргын тогоо, Тэрхийн цагаан нуур үзээд эхэндээ их сайхан байсоон. Тэгээд замын яг тал буюу Солонготын даваа даваад л зам бишдэж эхэлсэн. Зам барьж байгаа нэрээр хамаг замыг эвдчихсэн, дэгэн догон дэгэн догон гэсээр 40км газрыг 4 цаг туулах жишээний. Завхан аймгийн Сонгино сумаас цаашаа зам нь яг говийн зам шиг болж ирдийн байна. Үзэгдэх харагдах юмгүй, хоосон шар тал дээгүүр л давхиад байсан. Ядаж байхад энэ зун гандуу байсан болохоор нүдэнд торох ногоон өнгө харагдсангүй.
За харин Хяргас нуур хүрээд л сэтгэл сэргэж эхэлсэн дээ (яг үнэндээ Хяргас нуурын хаяанаас засмал зам дээр гарсийн кк). Зам жаахан муруйж Хяргас нуурын урд эрэг дээр байдаг хэцүү хад гэдэг газрыг үзсэн. Нуурын эрэг дээр цагаан хад чулуу тогтсон, цагаан хадан дээр нь шувуу үүрээ засаад өвөрмөц үзэмж төрхтэй болгосон сонирхолтой газар байна лээ. Яг л нэг гадаад далайд, гадаад оронд байгаа юм шиг сэтгэгдэл төрсөн.
Хяргас нуураас 200км сайхан засмал замаар давхиад Увс аймгийн Улаангом хот ордог юм байна. Аймгийн төв рүү орж ирэхэд 90 жилийн бэлтгэл гээд жинхэнэ бүтээн байгуулалт өрнөж байв. Улаангомд анх удаа ирж байгаа хүний нүдээр харахад аймгийн төв рүү орж ирэх зам дагуу хэдэн балгас болсон байшин харчихсан чинь тэр сэтгэгдэлээсээ салж чадахгүй байсан. Уг нь зөндөө олон шинэ байшингууд баригдаж  байгаа, бас засмал зам сайн тавьсан байна лээ. Аймгийн төвд нь зөндөө олон хөшөө байдаг юм билээ. Ю.Цэдэнбалын хөшөө, Гиваан баатрын хөшөө, Баянмөнх аваргын хөшөөнөөс гадна замын уулзварууд дээр морин хуурын хөшөөнүүд байдаг юм байна. 90 жил гээд чухам нүүрээ угааж, нөгөө хувцасаа өмсөнө гээч нь болсийн бишүү. Айл болгон хашаагаа будаад, зам талбайгаа засаад л цэвэрлээд л байсан.
Аймгийн төвийнхөө баруун зүгт сүрдмээр сайхан Хархираа уулс харагддаг нь үнэхээр сайхан. Бараг гэрээс орж гарах болгондоо харж бахдан биширж байв шд. Мөн Наранбулаг сумын наадам үзэх гэж явах замдаа мөнх цаст Цагаан Дэглий хайрханыг харсан. Үнэхээр сайхан. Балжинням аваргын нутаг Наранбулаг сумын наадам нь сумын төвөөсөө хол хангайн нуруунд болдог юм байна. Наадмын өглөө сумынхан нь бүгдээрээ тэр "шил" (ямар юмны шил билээ дээ) гэдэг газар руугаа явцгаагаад сум нь эзгүйрдэг юм билээ. Манай нөхөр надад жинхэнэ хангайн наадам үзүүлнэ гээд байсан, үнэхээр жинхэнэ хангайн наадам байсан шүү. Морь нь уулан дээр уралддаг, бөх нь уулан дээр барилддаг (ккк за жоохон хэтрүүлэг байлаа). Тэр шил гэдэг газраас нь урд зүгт Хяргас нуур, хойд зүгт Увс нуур харагддаг үнэхээр гоё газар байна лээ. Сумын наадам ч охид нь гоёж гоодон хоёр гурваараа хэлхэлдсэн, харцуул нь морь унан ханхалзсан жинхэнэ сайхан сумын наадам болсон доо ккк.
Наранбулаг сумын наадмын дараа улсын баяр наадмын үеэр Увсынхан чинь тэр чигээрээ Увс нуурынхаа эрэг дээр нааддаг юм билээ шд. Нуурын эргээр хүн, машин, майхан битүү. Нуур ч гэж нуур, Увс нуур үнэхээр гоё. Ус нь бүлээхэн болохоор нэг орчихвол буцаж гарахыг хүсэмгүй шүү.
Улсын наадмын дараа хойшоо хил гарч Тува улсын нийслэл, Ази тивийн төв цэг Кызыл хот ороод ирсэн. Боршоогийн хилийн боомтоос нутгийн машин дагаж явсан чинь аймаар хурдтай; 140-160 км/ц хурдтай давхисаар байгаад Кызыл орсон. Тэр замаар нь удаан явж болдгүймүү хаашайн кк. Кызылд 3 хонохдоо Бурхан минь яг шарагдаж үхэх гэж байсан. Арай дэндүү халуун газар байна лээ. Орой сэрүүн орохоор Енисэй мөрний эргээр зугаалж, Азийн төв цэгийг тэмдэглэсэн дурсгалт газрыг үзсэн. Уг нь Кызыл орж орос юм авах санаатай байсан боловч бараг байдаггүйм билээ. Байсан нь харин үнэтэй. Охиндоо л хэдэн орос тоглоом авах шив.
За тэгээд 7 сарын 22-25-ны өдрүүдэд Увс аймгийн түүхт 90 жилийн ой, Монгол бөхийн их баяр, Баруун бүсийн хурдан морины "Увс хурд-2015" гээд сүртэй сайхан нэртэй, сүртэй сайхан баяр наадам болсон доо. Ирсэн, үзсэн хүмүүс ч гэж тоймгүй олон. Наадмын нээлт үзсэн. Зохион байгуулалт сайтай, олон хүн хамруулсан их л гоё юм болж байна лээ. Увсынхан нутгийн алдартнууддаа эмээл хазаартай морь бэлэглэж байна лээ. Түрүүлсэн бөх, морины шагналууд ч бас том байна лээ. Их л мөнгө зарсан байх даа.
Наадам ч сайхан болсон. Харин Улаангомд сар шахуу болоход уйдсан шүү. Наадмын бэлтгэл гээд хүмүүс нь завгүй. Гарч орж үзэх харах юм байхгүй. Аятайхан хоолонд орчихоор ч газар байхгүй. Осолдохгүй л явахынхаа өмнө аймгийн музэй үзэж, захаар нь оров шд.
Энэ зуны аялал нэг иймэрхүү. Би ч явдалаас нь хаширсандаа Увс аймаг руу засмал зам бүтэн тавигдсан цагт л дараа дахиж ирнэ гээд хэлчихсэн байгаа.

Завгүй ээжийн ажлаа хийсээр

Декрит гэдэг нь яг үнэндээ ажил юм, босс нь л нялх амьтан болохоос биш гэсэн үг хичнээн үнэн. Ажилтай байх үедээ декриттэй гэртээ суухдаа хийнэ гэж баахан юм төлөвлөөд байсан байхгүй шүү. Юун илүү дутуу юм хийх байтугай хүүхдээсээ илүү гарч чадахгүй шинэхэн мама байноо. Өдөр хоног уйдах завгүй маш хурдан бөгөөд маш аз жаргалтайгаар өнгөрч байна. Жинхэнэ таашаалын ажил чинь энэ ээжийн ажил байна шд. Өмнө нь хийж байсан ажил, сургууль, амжилт хажууд нь юу ч биш юм гээч.
Бяцхан бяцханаа 6 сар хүрсэн. Өдөр болгон шахуу шинэ юм сураад хөөрхөн юмаа. Эргэдэг болсоноосоо хойш хаа сайгүй өнхөрөөд нэг газараа тогтохоо больсон. Хоолонд орж эхэлсэн болохоор ээж нь өдөржин хоол хийсээр байтал таарч байна. Хүүхдийн хоол чинь их ярьвигтай ажил байна шүү. Сая бас гэдсийг нь хямраагаад амжсан. Хүүхдийн гэдэс хямрахаар цагаан будааны шүүс, алим, банана өгдөг гэж нэг найз маань зааж өгөөд тэр дагуу хийсэн чинь харин хурдан зүгээр болсон шүү.
За тэгээд гадаа гарна, салхилна, нарлана гэдэг их ажил байна бас. Хүүхдээ бэлдэж, өөрийгөө бэлдэж байтал бараг цаг болно. Өглөө эрт босоогүй бол бэлдсээр байтал үд болоод гарч чадахгүй өнгөрч байгаам чинь. Орой харин 6-9 хооронд гарч байгаа. Гадаа гарах гэж бид 2 бараг гэрээ нүүлгээд тэргэн дээрээ ачаад явж байгаам шиг юм л болно шүү дээ. Хоёр гурван хүүхэдтэй ээжүүд яаж амжуулаад байдгийг ойлгохгүйнээ. Жинхэнэ супер ээжүүд л байдаг байх. 
Хүүхэд гэдэг чинь ёстой хөөрхөн юмаа. Мэдсэн бол аль эртнээс олон хүүхэдтэй болж байхгүй юу. Манай найзууд яагаад хэлдэггүй байсан байнаа гэхгүй юу ккк. Энд ганц бие хүмүүс байвал хэлчихэе эртхэн хүүхэдтэй болоорой.

Unknown

Хүн мэдэхгүй зүйлээсээ айдаг гэдэг үнэн юмаа. Due date ойртох тусам ямар байх бол гэсэн нэг айдас, санаа зовнил салахгүй юм. Тэгсэн хэрнээ өөрийгөө тайтгаруулах гээд энэ дэлхийн эмэгтэй хүн бүр үүнийг давж гардаг шүү дээ гэж бодох... Эмээ, ээж, эгч, ерөнхийлөгчийн гэргий, дуучин, жүжигчин, Викториас Сикретийн моделууд хүртэл үүнийг даваад л гарсан шүү дээ гэж бодох. Хэн нэг найзаараа, таньдаг хүнээрээ жишээ авч, тээр энэ хүмүүс бүгд л үүнийг тойрч биш туулж гарсан гэж өөрийгөө зоригжуулах. Бодоод байхад эхний хэдэн сар хурдан бас бодит бус юм шиг өнгөрчээ. Сүүлийн сард л энэ бүхэн бодит гэдгийг мэдэрч тэр утгаараа сэтгэл санаа ч хүчтэй болдог юм байна. Хүүхэддээ хамгийн анх оймс худалдаж авах тэр мөчид энэ бүхэн зүүд биш, төсөөлөл биш, бодит гэдгийг мэдрэх тэр хүчтэй сэтгэл хөдлөл. Өмнө нь дандаа бусдын хүүхдэд хувцас, бэлэг авдаг байсан хүн одоо энэ миний өөрийн хүүхдэд зориулсан гэж бодохоор гоё.
Мэдэхгүй зүйлтэй тулгарах болгонд ямар ч төсөөлөлгүй, ямар байх бол гэсэн бодол л төрөх. Анх оюутан болоод хүний нутагт явсан, шинэ хотод нүүж очих, шинэ улс орон, шинэ сургуульд орох, анх ажилд орох гээд л бүх мэдэхгүй зүйлийн босгон дээр яг л ийм мэдрэмж төрж байсан. Намайг тосон хүлээж буй зүйлийн талаар ямар ч төсөөлөлгүй хэр нь би чаднаа, болноо, бүтнээ гэсэн итгэлтэйгээр тэр бүхнийг даван туулж байсан. Одоо ч гэсэн өөртөө итгэлтэй баймаар байна. Надад айдас төрүүлж байгаа ч би чадна гэдэгтээ итгэлтэй байна.

Ховдог, харамч, идэмхий хүн байнаа

Бие давхар болсоноос хойш ам хуурайгүй идэж суудаг болсон. Ажлын ширээ бүр хүнсний лангуу боллоо л доо. Заавал нэг идэх юм хажууд байхгүй бол болохгүй. Жигнэмэг, боорцог, ааруул, жимс, хатаасан жимс, самар гээл шүүгээгээ дүүргэчихсэн. Шүүгээ хоосон бол өөртөө итгэлгүй санагдаад ажлаа ч хийж чадахгүй. Тиймээс хүнсний нөөц дундраад ирвэл бушуухан авч нөөцөлж байгаа юм чинь хэхэ. За идэх нь яахав гэхэд аймаар харамч болсондоо өөрийгөө гайхаад барахгүй нь. Нэг гадаад сайт дээрээс жирэмсэн эмэгтэйн нөхөр нь эхнэрийнхээ ямар харамч болсон тухай, өөрийнх нь идэх гэж авсан юмнаас, хоолноос идвэл уурладаг тухай бичсэн байхыг уншаад инээд хүрч байсан чинь өөрөө яг тийм болдог байна шд. Миний идэх юм гээд хажуудах хүнээсээ харамлаад үхэхнээ ккк. Сая хөдөө явж ирэхдээ айраг авсийн. Би ганцаараа ууна гээд бодчихсон. Орой гэрт хүн ирсэн чинь ээж хүнд айраг хийж өг гээд, би гүрийгээд өгөхгүй зогсоод байгаан бишүү кк. Өглөө босоод ирсэн хэн нэг нь миний айрагнаас уугаад дундруулчихсан байхаар нь хэн уучихав аа гээд бөөн юм болсон. Арай ч нээрээ хоолны харамч болно гэж бодож байсангүй. Нээрээ гүүний айраг уувал хөрс сайтай хүүхэд төрдөг гээд гүүний айраг ууж өгч байгаа. Эмч ч гэсэн айраг, тараг, ааруул цагаан идээ сайн идвэл өөр витамин энэ тэр уух шаардлагагүй гэсэн.

Гурилан бүтээгдэхүүн нээх хэрэглэдэггүй хүн чинь жигнэмэг, кекс, нарийн боовонд дуртай болсон. Өчигдөр сайхан зан хөдлөөд гэртээ cupcake хийлээ. Өмнө нь зөндөө хийж байсан ч энэ удаагийнх их гоё болсон. Зуурмагандаа хатаасан тоор болон нэг хэсгийг нь какаотой хийсэн юм. Жорыг нь орууллаа.

 

Орц:

 

2 ш өндөг

200 гр сүү

200 гр элсэн чихэр

150 гр масло/маргарин

400 гр гурил

1 уут ванилин

1 уут кекс хөөлгөгч (backpulver)

100 гр хатаасан тоор

 

Хийх заавар:

 

Эхлээд өндөг, элсэн чихэрээ хольж хөвсгөр цагаан болтол нь миксердэнэ. Дараа нь бусад орц болон сүү, хайлуулсан маргарин, гурил, хөөлгөгч, ванилинаа нэмж хийгээд үргэлжлүүлж миксердээд шингэвтэр зуурмаг гаргаж авна. Зуурмагандаа жижиглэж хэрчсэн хатаасан жимсээ хийгээд хутгаж байгаад капкек хэвэндээ хийгээд боллоо. 175 градуст урьдчилж халаасан дуковонд 25 минут жигнэнэ.

 

Энэ жор их амархан, амттай жор болохоор надад таалагддаг юм. Өөр төрлийн жимс, какао, кофе гээд дураараа өөрчилж болно.

 

 



 

Америкт суугаа эгчдээ бичсэн захидлын хариу

Би Монголд ирсэнийхээ дараа Америкд нэлээд олон жил амьдарсан эгчдээ зориулж Монголын нөхцөл байдал, эргэж ирсэн сэтгэгдэлийнхээ талаар Америкт суугаа эгчдээ бичсэн захидал -1  болон Америкт суугаа эгчдээ бичсэн захидал -2 бичиж байсан юм. Тэр үед миний захианд хариу болгож нэгэн уншигчаас доорх хариу ирж байсан. Сонирхолтой санагдаад блогдоо тавих зөвшөөрөл авсан байсан боловч оруулахаа мартаж явсаар сая л архив дундаас оллоо. Та бүгдэд өөр нэгэн Монголдоо буцаж ирсэн хүний сэтгэгдэлийг сонирхуулая. Энэ захиа 2012 оны 12 сард надад ирж байсан юм. Энэ зуур хэлэхэд Америкд сууж байсан эгч маань нутагтаа бүр мөсөн эргээд ирсэн шүү ;) 

*****************

Жоохон бодит бус санагдлаа. Удаж байгаад ирэхэд онгоцонд Монголчуудаа харахад бүгд яравгар, ганцxан хаалгатай нисэх буудлаар багтаж ядан чихэлдээд, гарах зай үлдээгээгүй чихсэн бөөн хар царай харагдаад, гэрийнхнийгээ олж харахад бүгд жижигхэн болсон харагдаад. Уг нь том унаанд суусан ч тас харанхуй ганцxан замаар сэгсрүүлж ядан яваад, яг л талд яваам шиг, хонины шивтэр хамар нэвт царгиад, гэртээ орох л жаргал байсандаа. Маргааш нь гадуур жоохон явсан хүүе, хаая гэсэн нэг л яарсан ууртай xүмүүс, зам дээр орилсон үглэсэн халтар цагдаа нар, хоорондоо хэрэлдсэн машины жолооч нар, бараг л гутал руу шүлсээ гах түй гэх залуус, дээрээс доошоо нь нэвтэртэл хараад хялалзаx xүүxнүүд, дуртай дургүй мөнгө л харсан үйлчилгээ байxгүй боxь зажилсан xудалдагч нар. Хамгийн амттай хоол ээжийн минь хоол болж, хамгийн найрсаг хүмүүс гэрийхэн л  болсон байдаг. Ажилд ороход сүрхий юм болж аваад, араас босс нь эргүүлж гүйгээд, цалингийн оронд үнэ өсгөцөн юмаа шаxаад, ажлын хүүхнүүд  ам уралдан сонжин яриад, аль өнгөтэй өмсөж зүүхгүй бол хүн биш гэх нь холгүй. Атаа жөтөө, хорон хов ихийг тэсэх нь дайнд явахаас ч хэцүү санагддаг. Бүгд л аягүй баян, тэнд байдаг бүх юм хугацаа нь дуусаад борц болчихсон хэдий ч хэд нугалсан үнээр зарна. Тэнд хүн бараг барьж харагдахгүй үнэтэй унаа xөлxөлдөөд, тэнд олдох нь бэрх аяфон хүн болгон бариад, үнэтэй үнэтэй брэндүүд xулхийг нь ч мэдэхгүй батьчихаад нэг нэгэндээ баярхах хүмүүс. Эцсийн эцэст хэдэн хошин шог үзээд л амьдрал өөрөө хошин шог гэмээр болдог юм да. Хороололд явж байсан хомэлэсс хүүхэд хөгс базаад, цүнx шүүрээд, замын голд гарцан дээр зогсож байсан микротой залуу хөх базаад, би гэдэг хүн жанглидаа дасан зохицохоос аргагүйд хүрсэн үе бий. Номын санд суутал хоорондоо ярьсан хүмүүс, кино үзсэн уйлсан хүүхэд, унтсан залуус. Хөл дээр гишгэчихээд замаа харж яваач малаа гэх эргүү модел маягийн бацаанууд, пабд суутал бүгд тамхи татаж, том том ярьсан жижиг гарууд, тв үзсэн чинь хоорондоо зодолдсон улс төрчид, тэгснээ төд удалгүй гудамжаар дүүрэн алт алт гэсэн согтуу шалдан хүмүүс. Эхний сар эргэн дасах нь битгий хэл ялгааг нь олж хардаг юм. Энэ л нутгийн хүн юм болохоор арайчдээ гэсэн сэтгэлээр гуних, гомдох, уурлах, чамлах зэрэгцэвч миний Монгол гэх Чингисийн цус оргилж, би чадна, би эх орноо хөгжүүлнэ гэж хэсэг боддог юм. Юм нээж ажиллуулья гэтэл баахан хүн орж ирээд ийм газар, тийм газар, тэгснээ нэг авгай орж ирээд бөөн загнаж байгаад хаагаад гараад явах. Мэдэхнээ мөнгө өгөх ёстой байсийм байна лэ. Гаргаж ч өгөөгүй найзууд юу авчрав гэж утас цохин уулзах, тооцоо хийх мөчид бүгд 00 гүйлдэх, хэцүү үе байдаг шд. Тэгээд тэсдэг юмда, давдаг юм, нэг мэдэхнээ дунд нь уусчихсан тууж явдгийм, гэхдээ л....

 

Сонин хачин

6 сарын 1-ээс нэг шинэ төсөл дээр ажиллах болоод сүүлийн 2 сар үнэхээр завгүй байлаа. Шинэ эхэлж байгаа юм болгон угаасаа эмх замбараагүй, хийх юм ихтэй байдаг хойно аргагүй юм даа. Өглөө ажил дээр ирээд ширээний ард суугаад аяга цай авахаар өндийж ч амжаагүй байхад өдрийн цай болчихсон, хоол идээл эргэж суугаал нэг мэдэхэд орой болчихсон, цаг яаж өнгөрч байгааг ч анзаарах завгүй өдрүүд өнгөрч байна. 7 сард ээлжийн амралтаа аваад нар салхинд гарна гэж байсан ч байхгүй болсон. Гэхдээ амралтаа хойшлуулж байгаад 9-10 сараас нэгмөсөн амрах бодолтой байгаа. Ажлын хажуугаар бас өөрийгөө бөөцийлөх ажилтай болсон. Өөрийгөө толинд харахаар өдрөөс өдөрт томорч байгаа өөрийнхөө төрхөнд дасч өгөхгүй л байгаа ккк. Хэвлий дотор нэг хүн өсч бойжоод, би энд байна шүү гэх шиг гар хөлөө хөдөлгөөд, бас хааяа зүрхний цохилтыг нь сонсох тэр мэдрэмж өмнө нь мэдэрч байсан ямар ч сонин мэдрэмжийг дагуулахын аргагүй.  Санаа сэтгэл өндөр, бие эрүүл болохоор эхний хэдэн сарыг сайн өнгөрөөсөн. Элдэв асуудал сэтгэл санаанаас үүсдэг гэж боддог болохоор бие эрүүл, сэтгэл сайхан тайван байвал бүх юм сайхан байна гэж бодож байгаа. Хэдийгээр ажлын ачаалал их байгаа ч гэсэн нойр хоолондоо сайн, амралтын өдрүүдээр боломжоороо салхинд гараад, эсвэл сайн гэгч унтаж амраад явж байгаа. Эхэндээ хоолны дуршил нэг ихсээд, нэг багасаад учрыг нь олохгүй, идэх уух юм олдохгүй хэцүү байгаам шиг санагдаж байсан ч яваандаа гайгүй болсон. Хүмүүс гэнэт сонин сонин хоолны дуршилтай болдог гэсэн гэтэл минийх болохоор аймаар жанк фүүд (junk food) идмээр санагдаад байсан ккк. Хоолонд бол сайн байсаан байсан. Хатаасан гоёо, ингэний хоормог хоёр л сайн нөлөө үзүүлсэн байх, хордлого энэ тэр нь гайгүй өнгөрсөн. Эргэн тойронд жирэмсэн эмэгтэйчүүд олон байна шүү. Хүмүүс морь жил гээд их хүүхэдтэй болж байгаа байх. Монголын 3 сая дахь иргэн дараа оны 1-р улиралд төрнө гэж байсан. Харин энэ янзаар бол хүмүүс олноороо төрөөд энэ оны сүүл гэхэд 3 сая иргэнтэй болчихийн бишүү ккк.   

Зун болонгуут хүмүүс бүгд л хөдөө гадаа явцгаасан байх юм. Хүн толгойтой болгон Хөвсгөл явдаг юмуу хаашаа юм. Нүүр номоор дүүрэн Хөвсгөл явсан хүмүүсийн зураг. Хөдөө ч зуншлаг сайхан болж байгаа юм шиг байна лээ. Нээх сайхан ногоон тал, цэнхэр тэнгэр, цэнгэг усны зураг дүүрэн. Хараад бүр атаархал төрөөд хаа ч хамаагүй хөдөө явмаар санагдаад байгаа. Гэхдээ бас хальт Тэрэлж явж ирсэн болж хорхойгоо түр дарсан. Наадмаар харин хол яваагүй ч гэсэн ойрхон зуур салхинд гарч бас хорхог хийгээд амжсан. Миний нээрээ хоолны сонирхол өөрчлөгдөөд мах, лууван идэх сонирхолгүй болчихсон байна лээ. Хоолны мах, лууванг нь ялгаад байдаг болчихсон.  

Өмнө нь хүмүүс бөмбөг залгисан гэж ярихаар муухай зүйлтэй зүйрлэж байгаа юм шиг санагддаг байсан чинь одоо нээрээ дээшээ хараад хэвтэхээр гэдсэн дотор бөмбөг хийчихсэн юм шиг тэр хэсэгтээ хөөрхөн бөмбийгөөд яг л бөмбөг залгичихсан гэж хэлмээр юм билээ хэхэхэ.

Зун болгон нэг тийшээ зугаалсаар байгаад муу зан суучихаж... зун болохоор л сэтгэл тогтохгүй хаа нэг тийшээ явмаар санагдаад байхийн. Гэхдээ энэ жилдээ өнжчихвөл дараа жилээс явж өгнө дөө гэж бодоол байгаа.

За ойрдоо нэг иймэрхүү сонинтой сууж байлаа. Ажил дээр түмэн завгүй, гэртээ компьютер асаадаггүй болохоор блогоо бичих ч зай завсар гарсангүй. Уг нь төлөвлөж байсанаараа найзуудаа уриад гэртээ төрсөн өдөрөө тэмдэглэсэн. Өглөөнөөс орой болтол баахан хоол хийсэн. Ширээ дүүргэх гэж их ажил болсон шүү.

Birthday home party - Бэлтгэл ажил

Удахгүй төрсөн өдөр болох нь. Нөхөр бид хоёр нэг өдөр төрсөн болохоор энэ жил давхар баяр тохиож байгаа гэсэн үг. Төрсөн өдөр миний хамгийн дуртай баяр болохоор энэ жилийн төрсөн өдрөө яаж тэмдэглэх вэ гэж нэлээн удаан бодсоны эцэст бүх найз  нөхөд, ах дүү саднаа дуудаад гэртээ "home party" хийхээр шийдлээ. Ингэснээр бүх хайртай дотны хүмүүстэйгээ баяраа хуваалцах боломжтой болж байгаан. Өмнө нь нэг удаа хүн тус бүртэй тэмдэглээд явсан чинь бүтэн долоо хоног төрсөн өдөр тэмдэглэчихсэн байсан кк. Гэртээ тэмдэглэхийн нэг сайн тал нь бас олон бэлэг цугларах боломжтой хэхэ. Харин хүмүүс бид хоёрт дунд нь нэг бэлэг өгөх болов уу, тус тусад нь бэлдэж ирэх болов уу. Тусдаа бэлэгтэй ирээрэй гэж захиж хэлнээ ерөөсөө.

За тэгээд төрсөн өдрийнхөө тухай би чинь бараг 2 сарын өмнөөс бодоод эхэлчихсэн. Одоо өдөр хоног ойртох тусам илүү детайлны төлөвлөгөө гаргах хэрэгтэй болоод байна. За бараг л хурим бэлдэх дайны юм болох гээд байна шүү ккк. Хамгийн том 2 зүйл бол 1) хоолны меню, 2) зочид хүлээн авах хуваарь.

Хоолны меню 3 үе шаттай байх юм шиг байна. Зочидоо цагийг нь хуваарилах болохоор өглөөнөөс орой хүртэл тасралтгүй хуваарь болно байх. Тэхээр ерөнхийдөө brunch, өдрийн хоол, оройн хоол бэлдэхэд болно гэсэн үг. Хавчуурга болгож харин нэлээд олон төрлийн зууш, салад, амттан, нарийн боов гэх мэт зүйлс төлөвлөж байна.

Азаар төрсөн өдөр бүтэн сайнд таарч байгаа болохоор 2 өдөр зочин хүлээж авах боломжтой.

Би нэг иймэрхүү хуваарь гаргаад байгаа:

Хагас сайн өдөр

12:00 -- А групп -- Манай арван жилийн ангийнхан
15:00 -- В групп -- Нөхрийн арван жилийн ангийнхан
19:00 -- С групп -- Аав, ээж, ах дүү нар

Бүтэн сайн өдөр

11:00 -- D групп -- Мон-Турк болон Туркэд хамт сурч байсан найзууд. Турк меню бэлдэнэ гэж бодож байгаа. Нарийн боов, турк цай, кофе гэх мэт тэдэнд сонирхолтой байна байх.

14:00 -- E групп -- Family with kids. Хүүхэдтэй гэр бүлүүдэд цагийн хувьд эртхэн мөн хоолны хувьд хөнгөхөн меню байвал таалагдана гэж бодож байна. Шаржигнуур тахиа, капкэйк, күүкийс, жимсний цуглуулга гэх мэт сонголт байж болно.

18:00 -- F групп -- Single friends. За тэгээд үлдсэн хүмүүсийг энэ группт оруулна. Хоорондоо танил байсан байгаагүй хамаагүй сингл найзуудаа нэг дор дуудахад нээх асуудал гарахгүй байх.

Хоолны меню

Ерөнхий хийх зүйлс

- Cookies
- Cupcakes
- Browni
- Fruits
- Үзэмний жүүс
- Компот

Brunch - Турк хоол

- Мини пидэ
- Поача
- Ачма
- Долма
- Мини сандвич
- Өндөгтэй төмс
- Өндөгтэй помидор

Өдрийн хоол

- Шаржигнуур тахиа
- Дукованд жигнэсэн casserolle (сосиск, төмс, чинжүү)
- Зутан шөл
- Бананатай, шоколадтай амттан
- Кимбаб

Оройн хоол

- Мини сандвич
- Мини шорлог
- Төмсний хучмал
- Соустай бөөрөнхий мах
- Амталсан будаа
- Алимны пай
- Төмсний салад

Одоогоор санаанд орж байгаа нь иймэрхүү байна. Юун төлөө рестораны тогооч ээжтэй билээ, ээжээсээ хоолны зохицолын талаар зөвлөгөө авч байгаад менюгээ илүү сайжруулна. Одоогийн байдлаар өөрөө хийж чадах байх гэж бодсон, санаанд багтаад байгаа зүйлсээ бичлээ. Заримыг нь гэхдээ өмнө нь огт хийж үзээгүй. Тэд нарыг бас туршиж хийж үзэх хэрэгтэй байна. Ер нь бялуунаас бусдыг бүгдийг өөрөө хийнэ гэж бодож байгаа.

Энэ хоолнуудыг амжилттай хийж чадах юм бол жорыг нь хоолны блог -д оруулнаа.

Номиогийн Солонгос кино өдрүүд

Үе үе киногоор өвчилдөг шинж тэмдэг нь илрээд сүүлийн үед өдөр шөнөгүй л кино үзэж байна. Уг нь энэ шинж тэмдэг нь илрэхгүй бол кино үзэх байтугай тв ч асаалгүй амьдарч чадах л хүн. Сүүлийн үед хэдэн Солонгос ОАК үзлээ. 16-20 ангитай кинонуудыг интернэтээр үзэж байгаа. Энэ кино үзэлт эхлэх болсон шалтгаан нь санамсаргүйгээр "Хааны зүрх" гэдэг киног олоод үзчихсэн чинь хөөрхөн санагдаад, тэрийгээ үзэж дуусгаад дараа нь тэнд тоглосон жүжигчдийн киног түүж үзээд гэх мэт явж өгсөн.

King 2 Hearts

"King 2 Hearts" гээд энэ их хөөрхөн кино байна лээ. Монгол ТВ дээр "Хааны 2 зүрх" гэсэн орчуулгатай гараад байхаар нь гайхаад байсийн. Уг нь бол хаан ч гэсэн зүрх сэтгэлтэй гэсэн утгатайм шиг байгаан. Энэ кинонд Өмнөд Солонгосын ханхүү болон Хойд Солонгосын тусгай албаны ажилтан бүсгүй хоёрын хайр дурлал гардаг. Бас хөөрхөн тэрүүхэндээ action маягийн кино байна лэ. Эхний 10-аад анги нь үнэхээр хөгжилтэй хөөрхөн байсан. Сүүлийн ангиуд нь харин эхлэснээсээ нэлээд өөр болоод явчихаж байна лээ.

Энэ кинон дээрх хамгийн хөөрхөн дүр, хамгийн хөөрхөн жүжигчин бол энэ залуу. Хааны ойр дотны бие хамгаалагч бөгөөд хааны дүү гүнжид дурласан залуу байгаам. Аймаар хөөрхөн. Хүн яахаараа ийм хөөрхөн царайлаг байж чаддаг байнаа гэж бодохоор ккк.
Энэ киног үзсэн дараагаа гол дүрийн эмэгтэйн (Ha Ji won) тоглосон "Secret garden" буюу Нууц цэцэрлэг гээд киног үзэж эхэлсэн.

Secret Garden

 Secret Garden дээр баян айлын залуу, ядуу орлон тоглогч хүүхэн хоёрын тухай гардаг. Нэг нууц цэцэрлэгт очсоноос болоод бороо орохоор энэ хоёрын сүнс солигдоод нэг нэгнийхээ биед орчихдог болчихдог. Тэгээл инээдтэй инээдтэй үйл явдлууд гарч эхлэнэ дээ. Хөгжилтэй, хөнгөн кино болохоор үзэхэд гоё. Энийг үзэж дуусчихаад Хааны зүрхийн гол дүрийн залуугийн тоглосон "Миний найз охин 9 сүүлт үнэг" гэдэг киног үзнэ гээд төлөвлөчихсөн байгаа.

Энэ дундуур бас "Боловсон эрчүүд" гэдэг киног үзээд амжсан. 40-өөд насны 4 залуугийн тухай, тэдний гэр бүл хайр дурлалын тухай гардаг бас маш хөгжилтэй хөөрхөн кино байна лээ. Энэ киноны гол дүрийн эмэгтэй жүжигчин (Kim Ha Neul) надад их таалагддаг. Өмнө нь нэг ангитай 2-3 киног нь үзэж байсан болохоор тэрний тоглосон кино гээд сонирхож үзсэн юм. Дараа нь энэ жүжигчний тоглосон "Piano" гээд ОАК-г нь олж үзнэ гээд бодцон байгаа.

A Gentelman's Dignity

Хэдэн сарын өмнө үзсэн Тайваны олон ангит "My Lucky Star" гээд кино аймаар их таалагдсан. Бүр дахин дахин үзэж байгаам бишүү. Уг нь ээлжийн амралт авсан үе таарсан болохоор өдөр шөнөгүй кино үзээд орондоо хэвтэхэд тохиромжтой байсан л да. Гэхдээ бас бал сар давхацсан болохоор тэгж болохгүй лдэ. Би одоо энэ киноны өвчинөөсөө салахгүй бол зарим үед асуудал үүсэх юм шиг байна лээ.

My Lucky Star

"My Lucky Star" дээр үнэт эдлэлийн дизайн зохиодог хүүхэн болон үнэт эдлэлийн том компанитай залуу хоёрын тухай гардаг. Тэр залууд нь Jimmy Lin тоглодог. Jimmy Lin угаасаа car racer болохоор энэ кинон дээр бас car racer болж гардаг. Энэ хоёрын түүх нээх хөөрхөн. Бас нэлээд адал явдалтай. Надад хамгийн их таалагдсан кинонуудын нэг байгаам.

Бал сараа төлөвлөх нь

Бал сар гэхээр л надад нэг ийм тунгалаг ус, өвсөн оройтой байшин санаанд ороод байдаг юм. Хуримаа хийгээд 2-3 долоо хонолоо. Одоо л нэг бал сарын аялалаа төлөвлөх сэхээтэй болж байх шиг байна. Уг нь хурим шахуу болоогүй байсан бол аль эртнээс төлөвлөчихөөд хуримынхаа маргааш бал сарынхаа аялалд гарч өгсөн байхгүй юу... За тэгээд төлөвлөхийн хоббитой хүн чинь юутай ч нэт ухаж хаагуур явж, юу хийж болох талаар жоохон судаллаа. Нөхөр бид хоёр хоёулаа аялах дуртай хүмүүс байгаан. Гэхдээ нөхөр бал сарын аялалаа далайн эрэг дээр хэвтэж өнгөрөөх хүсэлтэй, би болохоор бас бяцхаан адал явдал нэмчих сонирхолтой. Анхнаасаа Индонез, Вьетнам хоёрын нэг рүү явъя гэж тохирсон байсан юм. Вьетнам гэхээр надад их эгзотик, яг л бал сард тохирсон юм шиг санагдаад байгаа юм. Далай, амралт, адал явдал бүгд л багтана гэсэн үг. Уг нь жуулчны компанид захиалга өгөөд тэдний аялалаар явбал маш амар боловч "бал сар" гэдэг утгаараа өөрсдөө хувиараа явах нь илүү тохиромжтой юм шиг санагдав. Ямар аялал төлөвлөж сураагүй биш...

Эхний байдлаар гаргасан аялалын маршрут:

UB - HANOI - HALONG - HAINAN - GUANGZHOU - HONGKONG - MAKAU - BEIJING - UB

Day 1-2. Улаанбаатар - Ханой (Вьетнам) онгоцоор нисч очоод 1 өдөр Ханой хотоор зугаална. Энд үзэх газрууд гэвэл Хо Ши Миний бунхан, Нэг баганат сүм гэх мэт байгаа. 1 өдөр хангалттай байхоо.

One Pillar Pagoda

Day 3-4. Ханой - Халонг Бей болон усан завины аялал. Халонг Бей гэх энэ газар UNESCO-н дэлхийн соёлын өвд бүртгэгдсэн үнэхээр үзэсгэлэн төгс газар бөлгөө.



Халонг Бей

Халонг Бейд усан завиар зугаалах аялал 1 өдрийн эсвэл 2 өдөр/1 шөнийн гэх мэт сонголттой. Хамгийн аятайхан нь 2 өдөр/1 шөнийн аялал, ингэснээр энэ үзэсгэлэнт газар нар мандах, нар жаргахыг усан завин дээрээс харж болно. Junk boat tour нь 1 хүний $160-200 болно.

Халонг Бей усан завийн аялал

Анх энэ Халонг Бей-н зургийг харсанаас хойш л түүнийг үзэхийн мөрөөсөл болж бараг л шөнө зүүдэндээ харах нь холгүй байгаа. Үнэхээр гайхалтай сайхан газар гэдэгт нь эргэлзэх юм огт алга.

Day 5-6. Вьетнамын Халонг эрэг чинь Хайнан аралтай ойрхон юм байна. Энэ хооронд том усан онгоц байнга явдаг. Үнэ нь ч гэсэн боломжийн юм байна. Тиймээс эндээсээ Дорнын Хавай гэж нэрлэгддэг үзэсгэлэнт Хайнан арал руу яагаад явж болохгүй гэж? гэж бодов.

Халонг Бей - Хайнан маршрут

Энэ доор зурганд буй хөлөг онгоцоор Хайнан - Халонг Бей аялал хийдэг. 1 өрөө нь цонхтой цонхгүй гэдгээсээ хамаараад 1 хүний 1500-2000 юань юм билээ.

 

Star Aquarus Cruise Ship

Day 7-8. Хайнан арлын хоёр том хот болох нийслэл Хайкоу, аялал жуулчлалын диваажин Саня хоёр нь арлынхаа хойд урд хоёр захад байдаг юм байна. Хооронд нь гал тэрэг, автобусаар явж болно. Ердөө 100 юань.  Хайкоу хотоосоо эх газар луугаа гал тэргээр явах боломжтой. Харин Хайнанд байрлах нэлээд үнэтэй юм билээ.

Дорнын Хавай - Хайнан арал

Газрын зураг дээр харахад Хайнан Хонгконг ойрхон харагдсан тул маршрутандаа ХК-Макао нэмэхээр шийдэв. Мөн эртнээс нааш Гуанжоу хотыг үзэх сонирхолтой байсан тул ХК-с ойрхон Гуанжоу хотыг бас нэмчихэе ккк.  

Халонг - Хайнан - Хонгконг

Саня хотод далайн эрэг дээр 2 хоноод Хайкоу хот руу яваад, тэндээсээ Гуанжоу руу галт тэргээр явна. 150-200 юань.

Гуанжу - Хонгконг - Макао

Day 9-10. Гуанжу хотоор 1 өдөр зугаалчихаад Хонгконг руу галт тэргээр яваад ХК-н алдартай өндөр өндөр барилгуудыг Викториа Пик -с нь харчихвал болчих нь тэр.

Хонгконг

Day 11-12. Хонгконгод ирсэн хүн Макао оролгүй буцна гэж юу байхав, хаяанд нь ирчихээд тээ. Макао орж казинод тоглож мөнгөө үрэхгүй бол болохгүй шүү дээ эдр гээлүү кк.

Макао казино

Day 13-14. Хонгконгоос Бээжин рүү шууд галт тэргээр эсвэл онгоцоор явна. Гэхдээ галт тэрэг нь онгоцноос 2 дахин хямд. Бээжинд Цагаан хэрэм, Шувууны үүр, Хориотой хот гэх мэт газар үзнэ.

Цагаан хэрэм

Day 15. Бээжингээс УБ шууд ниснэ.

За 15 хоногийн мөрөөдлийн бал сарын аялал маань нэг иймэрхүү. Харин 2 хүний нийт зардал 6000 доллар буюу нийт унааны зардал 3500 доллар, нийт байр хоолны зардал 2500 доллар гэж тооцлоо. Эндээс Хонгконг-Макао аялалыг хасвал 5000 доллар, Гуанжоу-Бээжин аялалыг хасвал 4000 доллар орчим болно.

Тэнгэр травелийн аялалуудыг сонирхож үзвэл Бээжин - Вьетнам (Ханой, Халонг) 7ш/8ө-н аялал 2'300'000 төгрөг, Хайнан 6ш/7ө-н аялал 1'800'000 төгрөг, Хонгконг-Макао 4ш/5ө-н аялал 1'850'000 төгрөг байгаа юм билээ.

Бал сараар аялах Азийн орнууд гэсэн Гоолингоогийн энэ нийтлэлээс санаа авч нэг сумаар олон туулай буудахыг санаархсан бөлгөө. Гэвч ийм олон газраар яаруу сандруу, цаг хугацаанд баригдаж аялах нь бал сарын аялалд тохиромжгүй тул дээрх аялалыг төлөвлөж суухдаа аялалаа зөвхөн Хайнан - Халонг гэж өөрчлөх нь зүйтэй юм гэж бодож амжив. УБ-с шууд Хайнан орж далайн эрэг дээр хэд хоноод круйз хөлөг онгоцны аялалаар өнөөх сайхан Халонг Бей-ээ үзчихээд ирэхэд болоод л явчих нь тэр шүү дээ. Яг энэ аялал Тэнгэр травелд 2'500'000-3'000'000 төгрөг үнэтэй байна лээ.

Хурим - Guestbook

Хуримаараа ямар нэгэн сонирхолтой зүйл хийнэ гэж байсан даа. Түүнийгээ хийсэн шүү. "Guestbook" буюу зочдын сэтгэгдэлээ бичих дэвтэр. Хайрт "Pinterest" -ээс харсанаар бол гадныхан ихэвчлэн мод зураад, зочид нь модны мөчир дээр нь нэрээ бичих, хурууны хээ үлдээх, зургаа наах гэх мэтээр хийдэг юм байна. Түүнээс гадна хуримын зурагны эргэн тойронд сэтгэгдэл бичээд дараа нь жаазлаад хананд өлгөх гэх мэт санаа ч гэсэн түгээмэл юм. Өөр өвөрмөц санаанууд гэх юм бол; жижиг чулуун дээр бичээд шилэнд хийж хадгалах, дэлхийн бөмбөрцөг дээр бичих, дарсны үйсэн бөглөөн дээр бичих, пазл дээр бичих, шууд гардаг зураг авхуулаад үг бичиж албоманд хийх, тавган дээр бичих, модон самбар гэх мэт ямар нэгэн модон эдлэл дээр бичих гэх мэт зөндөө олон санаа байгаа. Надад Полорайдтэй санаа, пазл хийх санаа 2 хамгийн их таалагдсан боловч боломж нөхцөл нь таараагүй тул өөр арга олсон. Бид хоёр хуримаас өмнө бөөн юм болж байгальд гарч зураг авхуулсан даа... түүнийхээ хэргийг гаргаж зургийн цомог маягийн юм хийгээд хуриман дээрээ найзуудаараа үг бичүүлж авсан. Тун хөөрхөн болсон байна гээд хүмүүс магтаад байна лээ тэхээр сайхан л санаа байсан байгааз ккк.

 

 

 

 

Манайх нэг иймэрхүү болсон доо. Зургаа наагаагүй, шууд ном маягаар хэвлэчихсэн.

 

Ширээ хуваарилалтын ийм самбар бас хийсэн. Хүмүүс ширээгээ хайгаад бужигнаад байхгүй амар юм байна лээ.