Ховдог, харамч, идэмхий хүн байнаа

Бие давхар болсоноос хойш ам хуурайгүй идэж суудаг болсон. Ажлын ширээ бүр хүнсний лангуу боллоо л доо. Заавал нэг идэх юм хажууд байхгүй бол болохгүй. Жигнэмэг, боорцог, ааруул, жимс, хатаасан жимс, самар гээл шүүгээгээ дүүргэчихсэн. Шүүгээ хоосон бол өөртөө итгэлгүй санагдаад ажлаа ч хийж чадахгүй. Тиймээс хүнсний нөөц дундраад ирвэл бушуухан авч нөөцөлж байгаа юм чинь хэхэ. За идэх нь яахав гэхэд аймаар харамч болсондоо өөрийгөө гайхаад барахгүй нь. Нэг гадаад сайт дээрээс жирэмсэн эмэгтэйн нөхөр нь эхнэрийнхээ ямар харамч болсон тухай, өөрийнх нь идэх гэж авсан юмнаас, хоолноос идвэл уурладаг тухай бичсэн байхыг уншаад инээд хүрч байсан чинь өөрөө яг тийм болдог байна шд. Миний идэх юм гээд хажуудах хүнээсээ харамлаад үхэхнээ ккк. Сая хөдөө явж ирэхдээ айраг авсийн. Би ганцаараа ууна гээд бодчихсон. Орой гэрт хүн ирсэн чинь ээж хүнд айраг хийж өг гээд, би гүрийгээд өгөхгүй зогсоод байгаан бишүү кк. Өглөө босоод ирсэн хэн нэг нь миний айрагнаас уугаад дундруулчихсан байхаар нь хэн уучихав аа гээд бөөн юм болсон. Арай ч нээрээ хоолны харамч болно гэж бодож байсангүй. Нээрээ гүүний айраг уувал хөрс сайтай хүүхэд төрдөг гээд гүүний айраг ууж өгч байгаа. Эмч ч гэсэн айраг, тараг, ааруул цагаан идээ сайн идвэл өөр витамин энэ тэр уух шаардлагагүй гэсэн.

Гурилан бүтээгдэхүүн нээх хэрэглэдэггүй хүн чинь жигнэмэг, кекс, нарийн боовонд дуртай болсон. Өчигдөр сайхан зан хөдлөөд гэртээ cupcake хийлээ. Өмнө нь зөндөө хийж байсан ч энэ удаагийнх их гоё болсон. Зуурмагандаа хатаасан тоор болон нэг хэсгийг нь какаотой хийсэн юм. Жорыг нь орууллаа.

 

Орц:

 

2 ш өндөг

200 гр сүү

200 гр элсэн чихэр

150 гр масло/маргарин

400 гр гурил

1 уут ванилин

1 уут кекс хөөлгөгч (backpulver)

100 гр хатаасан тоор

 

Хийх заавар:

 

Эхлээд өндөг, элсэн чихэрээ хольж хөвсгөр цагаан болтол нь миксердэнэ. Дараа нь бусад орц болон сүү, хайлуулсан маргарин, гурил, хөөлгөгч, ванилинаа нэмж хийгээд үргэлжлүүлж миксердээд шингэвтэр зуурмаг гаргаж авна. Зуурмагандаа жижиглэж хэрчсэн хатаасан жимсээ хийгээд хутгаж байгаад капкек хэвэндээ хийгээд боллоо. 175 градуст урьдчилж халаасан дуковонд 25 минут жигнэнэ.

 

Энэ жор их амархан, амттай жор болохоор надад таалагддаг юм. Өөр төрлийн жимс, какао, кофе гээд дураараа өөрчилж болно.

 

 



 

Америкт суугаа эгчдээ бичсэн захидлын хариу

Би Монголд ирсэнийхээ дараа Америкд нэлээд олон жил амьдарсан эгчдээ зориулж Монголын нөхцөл байдал, эргэж ирсэн сэтгэгдэлийнхээ талаар Америкт суугаа эгчдээ бичсэн захидал -1  болон Америкт суугаа эгчдээ бичсэн захидал -2 бичиж байсан юм. Тэр үед миний захианд хариу болгож нэгэн уншигчаас доорх хариу ирж байсан. Сонирхолтой санагдаад блогдоо тавих зөвшөөрөл авсан байсан боловч оруулахаа мартаж явсаар сая л архив дундаас оллоо. Та бүгдэд өөр нэгэн Монголдоо буцаж ирсэн хүний сэтгэгдэлийг сонирхуулая. Энэ захиа 2012 оны 12 сард надад ирж байсан юм. Энэ зуур хэлэхэд Америкд сууж байсан эгч маань нутагтаа бүр мөсөн эргээд ирсэн шүү ;) 

*****************

Жоохон бодит бус санагдлаа. Удаж байгаад ирэхэд онгоцонд Монголчуудаа харахад бүгд яравгар, ганцxан хаалгатай нисэх буудлаар багтаж ядан чихэлдээд, гарах зай үлдээгээгүй чихсэн бөөн хар царай харагдаад, гэрийнхнийгээ олж харахад бүгд жижигхэн болсон харагдаад. Уг нь том унаанд суусан ч тас харанхуй ганцxан замаар сэгсрүүлж ядан яваад, яг л талд яваам шиг, хонины шивтэр хамар нэвт царгиад, гэртээ орох л жаргал байсандаа. Маргааш нь гадуур жоохон явсан хүүе, хаая гэсэн нэг л яарсан ууртай xүмүүс, зам дээр орилсон үглэсэн халтар цагдаа нар, хоорондоо хэрэлдсэн машины жолооч нар, бараг л гутал руу шүлсээ гах түй гэх залуус, дээрээс доошоо нь нэвтэртэл хараад хялалзаx xүүxнүүд, дуртай дургүй мөнгө л харсан үйлчилгээ байxгүй боxь зажилсан xудалдагч нар. Хамгийн амттай хоол ээжийн минь хоол болж, хамгийн найрсаг хүмүүс гэрийхэн л  болсон байдаг. Ажилд ороход сүрхий юм болж аваад, араас босс нь эргүүлж гүйгээд, цалингийн оронд үнэ өсгөцөн юмаа шаxаад, ажлын хүүхнүүд  ам уралдан сонжин яриад, аль өнгөтэй өмсөж зүүхгүй бол хүн биш гэх нь холгүй. Атаа жөтөө, хорон хов ихийг тэсэх нь дайнд явахаас ч хэцүү санагддаг. Бүгд л аягүй баян, тэнд байдаг бүх юм хугацаа нь дуусаад борц болчихсон хэдий ч хэд нугалсан үнээр зарна. Тэнд хүн бараг барьж харагдахгүй үнэтэй унаа xөлxөлдөөд, тэнд олдох нь бэрх аяфон хүн болгон бариад, үнэтэй үнэтэй брэндүүд xулхийг нь ч мэдэхгүй батьчихаад нэг нэгэндээ баярхах хүмүүс. Эцсийн эцэст хэдэн хошин шог үзээд л амьдрал өөрөө хошин шог гэмээр болдог юм да. Хороололд явж байсан хомэлэсс хүүхэд хөгс базаад, цүнx шүүрээд, замын голд гарцан дээр зогсож байсан микротой залуу хөх базаад, би гэдэг хүн жанглидаа дасан зохицохоос аргагүйд хүрсэн үе бий. Номын санд суутал хоорондоо ярьсан хүмүүс, кино үзсэн уйлсан хүүхэд, унтсан залуус. Хөл дээр гишгэчихээд замаа харж яваач малаа гэх эргүү модел маягийн бацаанууд, пабд суутал бүгд тамхи татаж, том том ярьсан жижиг гарууд, тв үзсэн чинь хоорондоо зодолдсон улс төрчид, тэгснээ төд удалгүй гудамжаар дүүрэн алт алт гэсэн согтуу шалдан хүмүүс. Эхний сар эргэн дасах нь битгий хэл ялгааг нь олж хардаг юм. Энэ л нутгийн хүн юм болохоор арайчдээ гэсэн сэтгэлээр гуних, гомдох, уурлах, чамлах зэрэгцэвч миний Монгол гэх Чингисийн цус оргилж, би чадна, би эх орноо хөгжүүлнэ гэж хэсэг боддог юм. Юм нээж ажиллуулья гэтэл баахан хүн орж ирээд ийм газар, тийм газар, тэгснээ нэг авгай орж ирээд бөөн загнаж байгаад хаагаад гараад явах. Мэдэхнээ мөнгө өгөх ёстой байсийм байна лэ. Гаргаж ч өгөөгүй найзууд юу авчрав гэж утас цохин уулзах, тооцоо хийх мөчид бүгд 00 гүйлдэх, хэцүү үе байдаг шд. Тэгээд тэсдэг юмда, давдаг юм, нэг мэдэхнээ дунд нь уусчихсан тууж явдгийм, гэхдээ л....

 

Сонин хачин

6 сарын 1-ээс нэг шинэ төсөл дээр ажиллах болоод сүүлийн 2 сар үнэхээр завгүй байлаа. Шинэ эхэлж байгаа юм болгон угаасаа эмх замбараагүй, хийх юм ихтэй байдаг хойно аргагүй юм даа. Өглөө ажил дээр ирээд ширээний ард суугаад аяга цай авахаар өндийж ч амжаагүй байхад өдрийн цай болчихсон, хоол идээл эргэж суугаал нэг мэдэхэд орой болчихсон, цаг яаж өнгөрч байгааг ч анзаарах завгүй өдрүүд өнгөрч байна. 7 сард ээлжийн амралтаа аваад нар салхинд гарна гэж байсан ч байхгүй болсон. Гэхдээ амралтаа хойшлуулж байгаад 9-10 сараас нэгмөсөн амрах бодолтой байгаа. Ажлын хажуугаар бас өөрийгөө бөөцийлөх ажилтай болсон. Өөрийгөө толинд харахаар өдрөөс өдөрт томорч байгаа өөрийнхөө төрхөнд дасч өгөхгүй л байгаа ккк. Хэвлий дотор нэг хүн өсч бойжоод, би энд байна шүү гэх шиг гар хөлөө хөдөлгөөд, бас хааяа зүрхний цохилтыг нь сонсох тэр мэдрэмж өмнө нь мэдэрч байсан ямар ч сонин мэдрэмжийг дагуулахын аргагүй.  Санаа сэтгэл өндөр, бие эрүүл болохоор эхний хэдэн сарыг сайн өнгөрөөсөн. Элдэв асуудал сэтгэл санаанаас үүсдэг гэж боддог болохоор бие эрүүл, сэтгэл сайхан тайван байвал бүх юм сайхан байна гэж бодож байгаа. Хэдийгээр ажлын ачаалал их байгаа ч гэсэн нойр хоолондоо сайн, амралтын өдрүүдээр боломжоороо салхинд гараад, эсвэл сайн гэгч унтаж амраад явж байгаа. Эхэндээ хоолны дуршил нэг ихсээд, нэг багасаад учрыг нь олохгүй, идэх уух юм олдохгүй хэцүү байгаам шиг санагдаж байсан ч яваандаа гайгүй болсон. Хүмүүс гэнэт сонин сонин хоолны дуршилтай болдог гэсэн гэтэл минийх болохоор аймаар жанк фүүд (junk food) идмээр санагдаад байсан ккк. Хоолонд бол сайн байсаан байсан. Хатаасан гоёо, ингэний хоормог хоёр л сайн нөлөө үзүүлсэн байх, хордлого энэ тэр нь гайгүй өнгөрсөн. Эргэн тойронд жирэмсэн эмэгтэйчүүд олон байна шүү. Хүмүүс морь жил гээд их хүүхэдтэй болж байгаа байх. Монголын 3 сая дахь иргэн дараа оны 1-р улиралд төрнө гэж байсан. Харин энэ янзаар бол хүмүүс олноороо төрөөд энэ оны сүүл гэхэд 3 сая иргэнтэй болчихийн бишүү ккк.   

Зун болонгуут хүмүүс бүгд л хөдөө гадаа явцгаасан байх юм. Хүн толгойтой болгон Хөвсгөл явдаг юмуу хаашаа юм. Нүүр номоор дүүрэн Хөвсгөл явсан хүмүүсийн зураг. Хөдөө ч зуншлаг сайхан болж байгаа юм шиг байна лээ. Нээх сайхан ногоон тал, цэнхэр тэнгэр, цэнгэг усны зураг дүүрэн. Хараад бүр атаархал төрөөд хаа ч хамаагүй хөдөө явмаар санагдаад байгаа. Гэхдээ бас хальт Тэрэлж явж ирсэн болж хорхойгоо түр дарсан. Наадмаар харин хол яваагүй ч гэсэн ойрхон зуур салхинд гарч бас хорхог хийгээд амжсан. Миний нээрээ хоолны сонирхол өөрчлөгдөөд мах, лууван идэх сонирхолгүй болчихсон байна лээ. Хоолны мах, лууванг нь ялгаад байдаг болчихсон.  

Өмнө нь хүмүүс бөмбөг залгисан гэж ярихаар муухай зүйлтэй зүйрлэж байгаа юм шиг санагддаг байсан чинь одоо нээрээ дээшээ хараад хэвтэхээр гэдсэн дотор бөмбөг хийчихсэн юм шиг тэр хэсэгтээ хөөрхөн бөмбийгөөд яг л бөмбөг залгичихсан гэж хэлмээр юм билээ хэхэхэ.

Зун болгон нэг тийшээ зугаалсаар байгаад муу зан суучихаж... зун болохоор л сэтгэл тогтохгүй хаа нэг тийшээ явмаар санагдаад байхийн. Гэхдээ энэ жилдээ өнжчихвөл дараа жилээс явж өгнө дөө гэж бодоол байгаа.

За ойрдоо нэг иймэрхүү сонинтой сууж байлаа. Ажил дээр түмэн завгүй, гэртээ компьютер асаадаггүй болохоор блогоо бичих ч зай завсар гарсангүй. Уг нь төлөвлөж байсанаараа найзуудаа уриад гэртээ төрсөн өдөрөө тэмдэглэсэн. Өглөөнөөс орой болтол баахан хоол хийсэн. Ширээ дүүргэх гэж их ажил болсон шүү.

Birthday home party - Бэлтгэл ажил

Удахгүй төрсөн өдөр болох нь. Нөхөр бид хоёр нэг өдөр төрсөн болохоор энэ жил давхар баяр тохиож байгаа гэсэн үг. Төрсөн өдөр миний хамгийн дуртай баяр болохоор энэ жилийн төрсөн өдрөө яаж тэмдэглэх вэ гэж нэлээн удаан бодсоны эцэст бүх найз  нөхөд, ах дүү саднаа дуудаад гэртээ "home party" хийхээр шийдлээ. Ингэснээр бүх хайртай дотны хүмүүстэйгээ баяраа хуваалцах боломжтой болж байгаан. Өмнө нь нэг удаа хүн тус бүртэй тэмдэглээд явсан чинь бүтэн долоо хоног төрсөн өдөр тэмдэглэчихсэн байсан кк. Гэртээ тэмдэглэхийн нэг сайн тал нь бас олон бэлэг цугларах боломжтой хэхэ. Харин хүмүүс бид хоёрт дунд нь нэг бэлэг өгөх болов уу, тус тусад нь бэлдэж ирэх болов уу. Тусдаа бэлэгтэй ирээрэй гэж захиж хэлнээ ерөөсөө.

За тэгээд төрсөн өдрийнхөө тухай би чинь бараг 2 сарын өмнөөс бодоод эхэлчихсэн. Одоо өдөр хоног ойртох тусам илүү детайлны төлөвлөгөө гаргах хэрэгтэй болоод байна. За бараг л хурим бэлдэх дайны юм болох гээд байна шүү ккк. Хамгийн том 2 зүйл бол 1) хоолны меню, 2) зочид хүлээн авах хуваарь.

Хоолны меню 3 үе шаттай байх юм шиг байна. Зочидоо цагийг нь хуваарилах болохоор өглөөнөөс орой хүртэл тасралтгүй хуваарь болно байх. Тэхээр ерөнхийдөө brunch, өдрийн хоол, оройн хоол бэлдэхэд болно гэсэн үг. Хавчуурга болгож харин нэлээд олон төрлийн зууш, салад, амттан, нарийн боов гэх мэт зүйлс төлөвлөж байна.

Азаар төрсөн өдөр бүтэн сайнд таарч байгаа болохоор 2 өдөр зочин хүлээж авах боломжтой.

Би нэг иймэрхүү хуваарь гаргаад байгаа:

Хагас сайн өдөр

12:00 -- А групп -- Манай арван жилийн ангийнхан
15:00 -- В групп -- Нөхрийн арван жилийн ангийнхан
19:00 -- С групп -- Аав, ээж, ах дүү нар

Бүтэн сайн өдөр

11:00 -- D групп -- Мон-Турк болон Туркэд хамт сурч байсан найзууд. Турк меню бэлдэнэ гэж бодож байгаа. Нарийн боов, турк цай, кофе гэх мэт тэдэнд сонирхолтой байна байх.

14:00 -- E групп -- Family with kids. Хүүхэдтэй гэр бүлүүдэд цагийн хувьд эртхэн мөн хоолны хувьд хөнгөхөн меню байвал таалагдана гэж бодож байна. Шаржигнуур тахиа, капкэйк, күүкийс, жимсний цуглуулга гэх мэт сонголт байж болно.

18:00 -- F групп -- Single friends. За тэгээд үлдсэн хүмүүсийг энэ группт оруулна. Хоорондоо танил байсан байгаагүй хамаагүй сингл найзуудаа нэг дор дуудахад нээх асуудал гарахгүй байх.

Хоолны меню

Ерөнхий хийх зүйлс

- Cookies
- Cupcakes
- Browni
- Fruits
- Үзэмний жүүс
- Компот

Brunch - Турк хоол

- Мини пидэ
- Поача
- Ачма
- Долма
- Мини сандвич
- Өндөгтэй төмс
- Өндөгтэй помидор

Өдрийн хоол

- Шаржигнуур тахиа
- Дукованд жигнэсэн casserolle (сосиск, төмс, чинжүү)
- Зутан шөл
- Бананатай, шоколадтай амттан
- Кимбаб

Оройн хоол

- Мини сандвич
- Мини шорлог
- Төмсний хучмал
- Соустай бөөрөнхий мах
- Амталсан будаа
- Алимны пай
- Төмсний салад

Одоогоор санаанд орж байгаа нь иймэрхүү байна. Юун төлөө рестораны тогооч ээжтэй билээ, ээжээсээ хоолны зохицолын талаар зөвлөгөө авч байгаад менюгээ илүү сайжруулна. Одоогийн байдлаар өөрөө хийж чадах байх гэж бодсон, санаанд багтаад байгаа зүйлсээ бичлээ. Заримыг нь гэхдээ өмнө нь огт хийж үзээгүй. Тэд нарыг бас туршиж хийж үзэх хэрэгтэй байна. Ер нь бялуунаас бусдыг бүгдийг өөрөө хийнэ гэж бодож байгаа.

Энэ хоолнуудыг амжилттай хийж чадах юм бол жорыг нь хоолны блог -д оруулнаа.

Номиогийн Солонгос кино өдрүүд

Үе үе киногоор өвчилдөг шинж тэмдэг нь илрээд сүүлийн үед өдөр шөнөгүй л кино үзэж байна. Уг нь энэ шинж тэмдэг нь илрэхгүй бол кино үзэх байтугай тв ч асаалгүй амьдарч чадах л хүн. Сүүлийн үед хэдэн Солонгос ОАК үзлээ. 16-20 ангитай кинонуудыг интернэтээр үзэж байгаа. Энэ кино үзэлт эхлэх болсон шалтгаан нь санамсаргүйгээр "Хааны зүрх" гэдэг киног олоод үзчихсэн чинь хөөрхөн санагдаад, тэрийгээ үзэж дуусгаад дараа нь тэнд тоглосон жүжигчдийн киног түүж үзээд гэх мэт явж өгсөн.

King 2 Hearts

"King 2 Hearts" гээд энэ их хөөрхөн кино байна лээ. Монгол ТВ дээр "Хааны 2 зүрх" гэсэн орчуулгатай гараад байхаар нь гайхаад байсийн. Уг нь бол хаан ч гэсэн зүрх сэтгэлтэй гэсэн утгатайм шиг байгаан. Энэ кинонд Өмнөд Солонгосын ханхүү болон Хойд Солонгосын тусгай албаны ажилтан бүсгүй хоёрын хайр дурлал гардаг. Бас хөөрхөн тэрүүхэндээ action маягийн кино байна лэ. Эхний 10-аад анги нь үнэхээр хөгжилтэй хөөрхөн байсан. Сүүлийн ангиуд нь харин эхлэснээсээ нэлээд өөр болоод явчихаж байна лээ.

Энэ кинон дээрх хамгийн хөөрхөн дүр, хамгийн хөөрхөн жүжигчин бол энэ залуу. Хааны ойр дотны бие хамгаалагч бөгөөд хааны дүү гүнжид дурласан залуу байгаам. Аймаар хөөрхөн. Хүн яахаараа ийм хөөрхөн царайлаг байж чаддаг байнаа гэж бодохоор ккк.
Энэ киног үзсэн дараагаа гол дүрийн эмэгтэйн (Ha Ji won) тоглосон "Secret garden" буюу Нууц цэцэрлэг гээд киног үзэж эхэлсэн.

Secret Garden

 Secret Garden дээр баян айлын залуу, ядуу орлон тоглогч хүүхэн хоёрын тухай гардаг. Нэг нууц цэцэрлэгт очсоноос болоод бороо орохоор энэ хоёрын сүнс солигдоод нэг нэгнийхээ биед орчихдог болчихдог. Тэгээл инээдтэй инээдтэй үйл явдлууд гарч эхлэнэ дээ. Хөгжилтэй, хөнгөн кино болохоор үзэхэд гоё. Энийг үзэж дуусчихаад Хааны зүрхийн гол дүрийн залуугийн тоглосон "Миний найз охин 9 сүүлт үнэг" гэдэг киног үзнэ гээд төлөвлөчихсөн байгаа.

Энэ дундуур бас "Боловсон эрчүүд" гэдэг киног үзээд амжсан. 40-өөд насны 4 залуугийн тухай, тэдний гэр бүл хайр дурлалын тухай гардаг бас маш хөгжилтэй хөөрхөн кино байна лээ. Энэ киноны гол дүрийн эмэгтэй жүжигчин (Kim Ha Neul) надад их таалагддаг. Өмнө нь нэг ангитай 2-3 киног нь үзэж байсан болохоор тэрний тоглосон кино гээд сонирхож үзсэн юм. Дараа нь энэ жүжигчний тоглосон "Piano" гээд ОАК-г нь олж үзнэ гээд бодцон байгаа.

A Gentelman's Dignity

Хэдэн сарын өмнө үзсэн Тайваны олон ангит "My Lucky Star" гээд кино аймаар их таалагдсан. Бүр дахин дахин үзэж байгаам бишүү. Уг нь ээлжийн амралт авсан үе таарсан болохоор өдөр шөнөгүй кино үзээд орондоо хэвтэхэд тохиромжтой байсан л да. Гэхдээ бас бал сар давхацсан болохоор тэгж болохгүй лдэ. Би одоо энэ киноны өвчинөөсөө салахгүй бол зарим үед асуудал үүсэх юм шиг байна лээ.

My Lucky Star

"My Lucky Star" дээр үнэт эдлэлийн дизайн зохиодог хүүхэн болон үнэт эдлэлийн том компанитай залуу хоёрын тухай гардаг. Тэр залууд нь Jimmy Lin тоглодог. Jimmy Lin угаасаа car racer болохоор энэ кинон дээр бас car racer болж гардаг. Энэ хоёрын түүх нээх хөөрхөн. Бас нэлээд адал явдалтай. Надад хамгийн их таалагдсан кинонуудын нэг байгаам.

Бал сараа төлөвлөх нь

Бал сар гэхээр л надад нэг ийм тунгалаг ус, өвсөн оройтой байшин санаанд ороод байдаг юм. Хуримаа хийгээд 2-3 долоо хонолоо. Одоо л нэг бал сарын аялалаа төлөвлөх сэхээтэй болж байх шиг байна. Уг нь хурим шахуу болоогүй байсан бол аль эртнээс төлөвлөчихөөд хуримынхаа маргааш бал сарынхаа аялалд гарч өгсөн байхгүй юу... За тэгээд төлөвлөхийн хоббитой хүн чинь юутай ч нэт ухаж хаагуур явж, юу хийж болох талаар жоохон судаллаа. Нөхөр бид хоёр хоёулаа аялах дуртай хүмүүс байгаан. Гэхдээ нөхөр бал сарын аялалаа далайн эрэг дээр хэвтэж өнгөрөөх хүсэлтэй, би болохоор бас бяцхаан адал явдал нэмчих сонирхолтой. Анхнаасаа Индонез, Вьетнам хоёрын нэг рүү явъя гэж тохирсон байсан юм. Вьетнам гэхээр надад их эгзотик, яг л бал сард тохирсон юм шиг санагдаад байгаа юм. Далай, амралт, адал явдал бүгд л багтана гэсэн үг. Уг нь жуулчны компанид захиалга өгөөд тэдний аялалаар явбал маш амар боловч "бал сар" гэдэг утгаараа өөрсдөө хувиараа явах нь илүү тохиромжтой юм шиг санагдав. Ямар аялал төлөвлөж сураагүй биш...

Эхний байдлаар гаргасан аялалын маршрут:

UB - HANOI - HALONG - HAINAN - GUANGZHOU - HONGKONG - MAKAU - BEIJING - UB

Day 1-2. Улаанбаатар - Ханой (Вьетнам) онгоцоор нисч очоод 1 өдөр Ханой хотоор зугаална. Энд үзэх газрууд гэвэл Хо Ши Миний бунхан, Нэг баганат сүм гэх мэт байгаа. 1 өдөр хангалттай байхоо.

One Pillar Pagoda

Day 3-4. Ханой - Халонг Бей болон усан завины аялал. Халонг Бей гэх энэ газар UNESCO-н дэлхийн соёлын өвд бүртгэгдсэн үнэхээр үзэсгэлэн төгс газар бөлгөө.



Халонг Бей

Халонг Бейд усан завиар зугаалах аялал 1 өдрийн эсвэл 2 өдөр/1 шөнийн гэх мэт сонголттой. Хамгийн аятайхан нь 2 өдөр/1 шөнийн аялал, ингэснээр энэ үзэсгэлэнт газар нар мандах, нар жаргахыг усан завин дээрээс харж болно. Junk boat tour нь 1 хүний $160-200 болно.

Халонг Бей усан завийн аялал

Анх энэ Халонг Бей-н зургийг харсанаас хойш л түүнийг үзэхийн мөрөөсөл болж бараг л шөнө зүүдэндээ харах нь холгүй байгаа. Үнэхээр гайхалтай сайхан газар гэдэгт нь эргэлзэх юм огт алга.

Day 5-6. Вьетнамын Халонг эрэг чинь Хайнан аралтай ойрхон юм байна. Энэ хооронд том усан онгоц байнга явдаг. Үнэ нь ч гэсэн боломжийн юм байна. Тиймээс эндээсээ Дорнын Хавай гэж нэрлэгддэг үзэсгэлэнт Хайнан арал руу яагаад явж болохгүй гэж? гэж бодов.

Халонг Бей - Хайнан маршрут

Энэ доор зурганд буй хөлөг онгоцоор Хайнан - Халонг Бей аялал хийдэг. 1 өрөө нь цонхтой цонхгүй гэдгээсээ хамаараад 1 хүний 1500-2000 юань юм билээ.

 

Star Aquarus Cruise Ship

Day 7-8. Хайнан арлын хоёр том хот болох нийслэл Хайкоу, аялал жуулчлалын диваажин Саня хоёр нь арлынхаа хойд урд хоёр захад байдаг юм байна. Хооронд нь гал тэрэг, автобусаар явж болно. Ердөө 100 юань.  Хайкоу хотоосоо эх газар луугаа гал тэргээр явах боломжтой. Харин Хайнанд байрлах нэлээд үнэтэй юм билээ.

Дорнын Хавай - Хайнан арал

Газрын зураг дээр харахад Хайнан Хонгконг ойрхон харагдсан тул маршрутандаа ХК-Макао нэмэхээр шийдэв. Мөн эртнээс нааш Гуанжоу хотыг үзэх сонирхолтой байсан тул ХК-с ойрхон Гуанжоу хотыг бас нэмчихэе ккк.  

Халонг - Хайнан - Хонгконг

Саня хотод далайн эрэг дээр 2 хоноод Хайкоу хот руу яваад, тэндээсээ Гуанжоу руу галт тэргээр явна. 150-200 юань.

Гуанжу - Хонгконг - Макао

Day 9-10. Гуанжу хотоор 1 өдөр зугаалчихаад Хонгконг руу галт тэргээр яваад ХК-н алдартай өндөр өндөр барилгуудыг Викториа Пик -с нь харчихвал болчих нь тэр.

Хонгконг

Day 11-12. Хонгконгод ирсэн хүн Макао оролгүй буцна гэж юу байхав, хаяанд нь ирчихээд тээ. Макао орж казинод тоглож мөнгөө үрэхгүй бол болохгүй шүү дээ эдр гээлүү кк.

Макао казино

Day 13-14. Хонгконгоос Бээжин рүү шууд галт тэргээр эсвэл онгоцоор явна. Гэхдээ галт тэрэг нь онгоцноос 2 дахин хямд. Бээжинд Цагаан хэрэм, Шувууны үүр, Хориотой хот гэх мэт газар үзнэ.

Цагаан хэрэм

Day 15. Бээжингээс УБ шууд ниснэ.

За 15 хоногийн мөрөөдлийн бал сарын аялал маань нэг иймэрхүү. Харин 2 хүний нийт зардал 6000 доллар буюу нийт унааны зардал 3500 доллар, нийт байр хоолны зардал 2500 доллар гэж тооцлоо. Эндээс Хонгконг-Макао аялалыг хасвал 5000 доллар, Гуанжоу-Бээжин аялалыг хасвал 4000 доллар орчим болно.

Тэнгэр травелийн аялалуудыг сонирхож үзвэл Бээжин - Вьетнам (Ханой, Халонг) 7ш/8ө-н аялал 2'300'000 төгрөг, Хайнан 6ш/7ө-н аялал 1'800'000 төгрөг, Хонгконг-Макао 4ш/5ө-н аялал 1'850'000 төгрөг байгаа юм билээ.

Бал сараар аялах Азийн орнууд гэсэн Гоолингоогийн энэ нийтлэлээс санаа авч нэг сумаар олон туулай буудахыг санаархсан бөлгөө. Гэвч ийм олон газраар яаруу сандруу, цаг хугацаанд баригдаж аялах нь бал сарын аялалд тохиромжгүй тул дээрх аялалыг төлөвлөж суухдаа аялалаа зөвхөн Хайнан - Халонг гэж өөрчлөх нь зүйтэй юм гэж бодож амжив. УБ-с шууд Хайнан орж далайн эрэг дээр хэд хоноод круйз хөлөг онгоцны аялалаар өнөөх сайхан Халонг Бей-ээ үзчихээд ирэхэд болоод л явчих нь тэр шүү дээ. Яг энэ аялал Тэнгэр травелд 2'500'000-3'000'000 төгрөг үнэтэй байна лээ.

Хурим - Guestbook

Хуримаараа ямар нэгэн сонирхолтой зүйл хийнэ гэж байсан даа. Түүнийгээ хийсэн шүү. "Guestbook" буюу зочдын сэтгэгдэлээ бичих дэвтэр. Хайрт "Pinterest" -ээс харсанаар бол гадныхан ихэвчлэн мод зураад, зочид нь модны мөчир дээр нь нэрээ бичих, хурууны хээ үлдээх, зургаа наах гэх мэтээр хийдэг юм байна. Түүнээс гадна хуримын зурагны эргэн тойронд сэтгэгдэл бичээд дараа нь жаазлаад хананд өлгөх гэх мэт санаа ч гэсэн түгээмэл юм. Өөр өвөрмөц санаанууд гэх юм бол; жижиг чулуун дээр бичээд шилэнд хийж хадгалах, дэлхийн бөмбөрцөг дээр бичих, дарсны үйсэн бөглөөн дээр бичих, пазл дээр бичих, шууд гардаг зураг авхуулаад үг бичиж албоманд хийх, тавган дээр бичих, модон самбар гэх мэт ямар нэгэн модон эдлэл дээр бичих гэх мэт зөндөө олон санаа байгаа. Надад Полорайдтэй санаа, пазл хийх санаа 2 хамгийн их таалагдсан боловч боломж нөхцөл нь таараагүй тул өөр арга олсон. Бид хоёр хуримаас өмнө бөөн юм болж байгальд гарч зураг авхуулсан даа... түүнийхээ хэргийг гаргаж зургийн цомог маягийн юм хийгээд хуриман дээрээ найзуудаараа үг бичүүлж авсан. Тун хөөрхөн болсон байна гээд хүмүүс магтаад байна лээ тэхээр сайхан л санаа байсан байгааз ккк.

 

 

 

 

Манайх нэг иймэрхүү болсон доо. Зургаа наагаагүй, шууд ном маягаар хэвлэчихсэн.

 

Ширээ хуваарилалтын ийм самбар бас хийсэн. Хүмүүс ширээгээ хайгаад бужигнаад байхгүй амар юм байна лээ.

Бэр мөргөх ёс

Одоогийн бидний залуус ёс жаяг сайн мэдэх биш ямар, хуриман дээрээ ёс алдаж хадмын талд эвгүй байдалд орох вий гэж эмээж л байлаа. Манай гэрийхэн хурим найрын зан үйл гээд сүйд болоод байдаггүй. Харин говийн бүсгүй хангайн бэр болсон чинь хадмын тал маань нэлээд ёс жаягтай улс байна.

Хуримын өдрийн өглөө бэр буулгах гэж ирсэн хүмүүс нь бэлэг сэлт бэлдэж ирээд гэрт байгаа бүх хүмүүст гар цайлгах бэлэг өгдөг юм байна. Бэр авахаар хүргэн, хүргэний талын нэг ахмад хүн (нагац ах), бэргэн, ивээл жилтэй хүн гэх мэт хүмүүс ирдэг юм байна. Бэр авахаар ирэх хүмүүсийн бүрэлдэхүүн нь сондгой тоотой байх ба бэр болон бэртэй хамт явах мөн сондгой тоотой хүмүүсийг аваад тэгш тоотой болоод буцдаг гэнэ. Бэрийг авч явах цаг болоход ивээл жилтэй хүн, бэргэн хоёр нь бэрээ хоёр талаас нь сугадаад гардаг аж. Дээр үед бол бэр дургүй байгаа дүр үзүүлж явахгүй гэж орны толгойноос зууралддаг байжээ. Би ч одоо тэгэх нь хаашаа юм тэхдээ бас баярлаад инээгээд гүйгээд байх нь хаашаа юм, нэг тэр хоёрын дунд л айлын бэр болохоор мордлоо шд ккк. Бэрийг авчирсан хүмүүс хүргэний гэрт ирэхэд угтаж аваад сүү амсуулж, гэрт байгаа бүх хүмүүст золгуулдаг юм байна. Дараа нь бэрийн өмсөж ирсэн хувцасыг солиод хадмын тал иж бүрэн хувцас гутал өмсгөж өөрийн хүн болгож авдаг гэнэ. Хувцасаа сольсон дараагаа бэр анхны галаа асааж, цайгаа чанаад, Бурханд дээжийг нь тавьж, зул өргөөд Бурханд мөргөдөг юм байна. Дээр үед бол галд мөргөдөг байжээ. Орчин үеийн байранд ямар цахилгаан зууханд мөргөлтэй биш, цайны дээжээ өргөөд ёсыг гүйцэлдүүлэв.

Найрын орой "хөшиг татах ёс" гэж байдаг юм байна. Энэ нь хоёр талын аав хоёр хүүхдийнхээ орны урдуур унжсан хөшгийг татаж өгч, нэг ёсондоо эхнэр нөхөр болохыг нь хүлээн зөвшөөрч байгаа гэсэн үг гэж ойлгосон.

Найрын дараа хэд хоногоос эхлээд "бэр мөргөх ёс" гэж байдаг юм байна. Энэ нь шинэ бэр хадмын талын айлуудар айлчилж мөргөж ёслохыг хэлдэг юм байна. Эхний ээлжинд хадам аавындаа очоод, хадам аав ээж хоёртоо бэлэг барьж, Бурханд нь есөн удаа сунаж мөргөсөн. Айл болгонд очоод сунаж мөргөөд явах биш л байгаадаа гэж бодож байгаа ккк. Гэхдээ бэр мөргөх ёсны нэг гоё юм нь очсон айл болгон шинэ бэрд бэлэг өгдөг юм байна. Аав, ээж, ах нар нь мал зааж өгдөг гэнэ. Одоо ч би хэдэн малтай болцон байгаа шүү лол. Шинэ бэрдээ бас өвчүү чанаж өгдөг юм байна. Яг ямар учиртайг нь мэдээгүй гэхдээ л чанаж өгдөг ёстой юм гэсэн. Тэгээд өвчүүгээ бүгдийг нь ид гээд байсан. Харин шинэ бэр өвчүүгээ бүгдийг нь ганцаараа идэж болохгүй, нөхөртэйгээ хувааж идэх хэрэгтэйн гэнэ лээ шүү. Манай найз надад сануулж хэлээгүй бол ч би аягүй бол идэх ёстойм байх гээл бүгдийг нь идэж орхих байсан байх шүү ккк. За хэтруулж байнаа, арай ч нэг бүтэн өвчүү ганцаараа идэж чадахгүй байха.

Айлын эхнэр болсон чинь идээ цайныхаа дээжийг нөхөртөө аягалах, зул өргөх, орой болгон хоол хийх гээд ганц бие байхдаа анхаарч үзэж байгаагүй зүйлүүд гарч ирдэг юм байна. Одоо бид ёс заншилаа мэдэхгүй байгаа ч яваандаа нас яваад ирэхээр мэдэж байх нь зүйтэйм байна даа гэж бодсон. Одоо бол ахмадуудыгаа дагаад, тэднээсээ асууж мэдээд ёс үйлдээд байнаа. Гэвч тэд маань яваад өгсөний дараа хэнээсээ гэх билээ дээ. Тиймээс одооноос ёс заншилаа сайн сурч, мэдэж авнаа.

Хурим сайхан боллоо

Зээ бидэн хоёр "Тийн ялгуусан" хэмээх усан могой жилийн зуны адаг сарын 20-ны билэгт сайн өдөр гэр бүл болж, хурим найраа хийн Монголын сайхан өрх бүлийн тоог нэгээр нэмлээ.

Хурим сайхан болсон. Мэдээж санаа зовоосон жижиг сажиг асуудлууд зөндөө гарч ирдэг юм билээ. Гэхдээ хамгийн гол нь бүх юм сайхан болно гэдэгт итгээд өөрийгөө тайвшруулж, эл өдрийн үйл явдлаас таашаал авахаа бодох хэрэгтэй юм билээ. Бид хоёр их сэтгэл хөөрөлтэй, аз жаргалтай, баяр баясалтай байсан юм шиг байгаан. Сүүлд нь гэрийнхэн та хоёр инээгээд л байсан, инээсээр байгаад нүүрэнд нь инээмсэглэлийн үрчлээ суучихсан байсан гэж коммент хэлж байна лээ. Би бол шууд таашаал авахаа л бодсон ккк. Энэ олон хүн бидний төлөө цуглаж, энэ бүх үйл явдал бид хоёрын эргэн тойронд болж байна гэж бодохоор л гоё санагдаад өөрийн эрхгүй инээгээд байсан кк.

Тэр өдөр манайхан бараг 04 гэж унтаад 05 гэж боссон байх шүү. Аав, ээж хоёр бэлтгэл хангаад лав нойргүй хоносон байхаа. Өглөө нь хадмын талынхан бэр буулгах гэж ирээд, цай идээ будаа болоод, дараа нь бэлэг сэлтээ өгөөд бэрээ аваад гардаг юм байна. Нөхөр бид хоёрын амьдрах гэрт очиход хүмүүс цуглачихсан найрлаж байсан.





Үс засалт, нүүр будалт

Шинэ гэртээ цахилгаан зуух асааж цайгаа чанаж, Бурхандаа мөргөсөн дараа шууд үс гэзэг, нүүр нүдний ажилдаа орсон. Их л эрт эхэллээ гэж бодсон хэр нь амжихгүйгээ дөхөж байна лээ шүү. Хамгийн түрүүнд бэр, бэргэнээсээ эхэлж янзлах ёстойм байна лээ. Манай бэргэн хамгийн сүүлд үлдээд арайтай л хуримнаас хоцорчихоогүй.

Бэргэн (эсвэл орчин үеийнхээр bridesmaid) хуриманд их чухал үүрэг рольтой хүмүүс байдаг юм байна. Хуримын ёслолын турш хоёр талын бэргэн сүйт бүсгүй, сүйт залуу хоёрыг дагаж явж, туслаж, мөн гэрлэлтийн гэрч болдог юм байна. Хуримын ордны үйл ажиллагаа их таалагдсан. Хүмүүс нь найрсаг, юу хийх, яах ёстойг бүгдийг нь хэлээд өгчихдөг юм билээ. Гэрлэх ёслолыг нэг эмэгтэй удирдаж явуулсан. Тэр хүний дуу хоолой уянгалаг намуухан, Боролдойн цагийн үлгэр уншиж байгаа юм шиг санагдаад инээд хүрээд байсан кк.

 

Хүлээлгийн өрөөнд

Гэрлэх ёслол эхлэхийн өмнөхөн хүлээлгийн өрөөнд сууж байхад их догдолдог юм билээ. Хувцас, үс, нүүр ямар байгаа бол гээл... Хамгийн гол нь өөртөө таалагдсан даашинз, үс засалт болон нүүр будалт хийлгэсэн байхад өөртөө итгэлтэй бөгөөд чин сэтгэлээсээ инээвэл би гоё харагдана гэж бодоод л инээгээд байх хэрэгтэй. Гэрлэх ёслол эхлэхэд догдолж уйлах байх гэж бодсон чинь харин гайгүй шүү.  Уйлаагүй.  Ээж намайг инээгээд л байсан гэж хэлсэн. Сүүлд хуримын бичлэгээ үзэхэд инээж байсан нь гоё харагдаж байна лээ.

Гэрлэх ёслолын ордны шатаар дээшээ алхаж байхад дуусахгүй юм шиг санагдаад алхаад л байсан, алхаад л байсан хэхэхэ. Хормойгоо сайн дээш нь өргөөд, цэх хараад, инээмсэглээд алхаарай гэж зааварлаж хэлсэн юм. Тэгээд заасан дагуу алхаад байсан. Миний алхсан хамгийн урт шат тэр байсан байхаа кк. Уг нь харахад хэдхэн л шат байсан даа гэж мэж бодсон.  Ёслолын өргөө нь аймаар халуун байсан тул нүүрээ сэвмээр, үсээ янзалмаар байсан ч гүрийсэн л дээ кк. Нээрээ тэр тулганд бэлэгдлийн гал асаах ёслол дээр урт хумстай байвал шатахаар юм билээ. Ер нь тэгээд бэр урт хумстай байсанаас цэвэрхэн маникюртэй богино хумстай байсан нь гоё харагдах байхаа.

Гэрлэх ёслолын ордноос гараад Сүхбаатарын талбай орсон. Аймаар халуун, нартай өдөр байсан. Чингисийн хөшөө засвартай байсан болохоор хөшөөнд цэцэг өргөж зураг авхуулж чадаагүй. Харин оронд нь Сүх жанжины хөшөөтэй зургаа авхуулсан даа кк. Талбай дээр явж байхад хажуугаар явж байгаа хүмүүс баяр хүргээд, гоё харагдаж байна, аз жаргал хүсье энэ тэр гэж хэлэхээр гоё санагддаг юм билээ. Өмнө нь хуримтай тааралдаад бэрийг нь хардаг байсан болохоор хүмүүс бас намайг харж байгаадаа гэж бодогдоод байдаг юм билээ кк.

Хуримын цуваа

Манай хуримын цуваа гурван ижилхэн тас хар өнгийн жижиг машинаар толгойлуулсан их гоё цуваа болсон. Ер нь хуримын цуваа жижиг машинаар толгойлуулсан байвал гоё харагдах юм байна лээ шүү. Хэрэв өнгөрсөн сарын 27-ны өдөр тийм гурван машинтай хуримтай таарсан бол тэр чинь миний хурим байсан шүү эдр кк. Талбайгаас хөдлөөд Гандан хийд орсон. Оройны хүлээн авалтаас өмнө их ядрахгүйн тулд маршрутаа богинохон зохиосон. Үдээс хойшдоо дахин үсээ янзлуулж, будгаа сэргээх цаг гаргах хэрэгтэй. Өглөө гэртээ дуудаж үс, нүүрээ янзлуулсан хүмүүстэйгээ үдээс хойш бас дахиж янзлахаар тохирчих нь амар юм билээ. Миний нүүр будалтыг хийсэн хүн ёстой сайн байсан. Сонирхож байгаа сүйт бүсгүй байвал жичдээ холбогдож нэр, утсыг нь авч болно шү ;)

Оройны хүлээн авалтан дээрээ өглөөний ёслолоос илүү догдолсон. Яагаад гэхээр өглөө 40-50 хүн ирж оролцсон бол орой 200 гаран хүн, тэгээд ангийнхан, найз нөхөд, хамт ажиллагсад ирнэ. Дээрээс нь нөхрийн талынхан, ангийнхан нь, найзууд нь ямар хүнтэй сууж байгааг нь сонжиж харна гэх мэт олны нүд шууд чам дээр тусна гэж бодохоор л аймаар их догдолдог юм билээ. Хуримын ёслол ямар болох нь, гоё сайхан болох нь хөтлөгчөөс хамаарна гэсэн тул бид хоёр үүн дээр их анхаарсан. Манай хөтлөгч үнэхээр мундаг байсан. Манай хуримын дуу хуур, хөгжөөн, идээ ундаа таарсан маш сайхан хурим болсон гэж өөрөө дүгнээд байгаа.  Хүмүүс ч тэгж хэлээд байгаа.
 

Энийг тэгдэг байж, тэрийг тэгдэг байж гэж хэлэх юм гарсан л даа мэдээж. Жишээ нь эртхэн босоод ширээ ширээ хэсээд хүмүүсд ирсэнд нь баярласанаа хэлж, хундага тулгаж, зураг авхуулж байдаг байж гэж бодсон. Хуримын ёслолд нэг дуулаад, нэг суугаад, нэг бүжиглээд, нэг суугаад, ураг батжих, голомт бадраах, ууц хөндөх, бэлэг өгөх гэх мэт олон юм хийсээр байтал нэг мэдэхэд дуусах болчихсон байдаг юм байна. Өмнө нь хуримаа хийсэн найзууд юм идэж амждаггүй тул хоол идэхээ мартаваа гэж хэлээд байсаныг нь санан санан би лав хоол л идээд байсанаа санаж байна ккк. Хуримын бялуу задалж амссан дараагаа гоё амттай бялуу байна ширээндээ сууж байгаад иднэ гэж бодоод явж байсан боловч дундуур нь өөр юм гарч ирээд мартчихсан байна лээ. Одоо бялуунаасаа идэх байсийн гээд харамсаад байгаа.

Сүйт бүсгүйн цэцэг

Өөр нэг мартсан зүйл гэвэл сүйт бүсгүйн гарын цэцгээ шидэхээ мартсан байна лээ. 18-аас дээш насны ганц бие бүсгүйчүүдийг цуглуулж байгаад цэцгээ шиднэ гээд яг зарлах гээд тайз руу гарах гэтэл өөр хүмүүс гарчихсан дуулж байсан тул түүний дараа болоё гээд сууж байсан чинь тэр чигт нь мартсан байна лээ. Тэр их бужигнаан дунд юм их мартагддаг тул з/б-дээ юмуу хөтлөгчдөө ийм ийм юм хийнэ гээд бичээд өгчих хэрэгтэй байсан юм билээ. Манай найзууд болон нөхрийн найзууд дуу бэлдэж ирсэн боловч зарим нь дуулж амжаагүй гэсэн.

Миний ганц урам хугарсан зүйл бол зочид дутуу ирсэн явдал байлаа. Хуримаас 2-3 хоногийн өмнө урьсан зочдоосоо ирэх эсэхийг нь баталгаажуулж асуугаад, ресторандаа хүнийхээ тоог өгч мөнгөө төлдөг. Хүн илүү ирвэл хоол нэмээд тооцоогоо нэмж хийж болох ч хүн дутуу ирвэл зөрүүг нь буцааж олгодоггүй юм байна. 10-20 хүн ирээгүй тохиолдолд тэгээл хагас сая, сая төгрөгөөр шатна гэсэн үг л дээ. Ирэх эсэх нь эргэлзээтэй байгаа хүнийг тооноосоо хасаад тоогоо өгч болох ч яг ирнэ гэж хэлсэн хүнийг тооноосоо хасах муухай болохоор яг ирнэ гэж confirm хийсэн хүмүүстээ тулгаад тоогоо өгсөн болохоор хоол илүү гарч, жоохон зарлага болсон. Энэ асуудлыг яаж шийдэж болох байсан талаар зөндөө ярилцсаны эцэст ер нь л хүний хуриманд очно гэж хэлсэн хүн очих л хэрэгтэй юм байна гэдэг дээр санал нийлсэн. Хэрэв очиж чадахгүйд хүрвэл заавал хуримын эздэд очиж чадахгүй болсоноо мэдэгдэх  хэрэгтэй юм байна. Цаад хүмүүс чинь ширээ сандалаа түүний дагуу зохицуулна шүү дээ.

Хуримын бичлэг заавал хийлгэх хэрэгтэй. Дараа нь үзэхэд ёстой гоё юм билээ. Мэргэжлийн зурагчин, зураглаач хөлсөлвөл санаа зовохгүй амар л юм билээ. Зурагчин чинь сайн, мэдрэмжтэй зурагчин байж, яг эгзэгтэй, гоё гоё агшингуудыг буулгаж авсан байх шаардлагатай. Тэр хуриманд бүх хүн л аппараттай ирсэн, зөндөө хүмүүс л зураг авч байна байх. Тэхдээ аль болох хөлсөлсөн зурагчин руугаа юмуу гол зурагчин руугаа харж байх хэрэгтэй. Манай хувьд бичлэг маш гоё болсон. Харин зурагны хувьд яг гоё агшинг буулгаж авсан зураг ховор юм шиг санагдаад сэтгэл жаахан дундуур байгаа.  

Бүтэн сар бэлдсэн хуримын ажил дууссан чинь хийх юмгүй самгардаж эдр. Одоо юу хийх билээ гэж бодож эдр. Одоо хүүхэд л хийдэг байх даа ккк.

 

Маргааш хурим! Яанааааааа

Хуримын өдөр ингээд хаяанд хүрээд ирдэг юм байж. Сүүлийн 3 өдөр ёстой ухаан жолоогүй ажилтай байлаа.Юу ч гэж амжуулаад байгальд гараад зураг авхуулаад ирсээн. Гэхдээ тэгсэн эсэн биш шумууланд хазуулаад бондгор бондгор болчихсон. Эмийн сангуудаар шумуулын тос хайгаад нэгийг ч олж чадсангүй. Шумуулын тос гэдэг юм байдаггүй хэрэг үү, эмийн санд зардаггүй хэрэг үү гэдгийг ойлгоогүй. Монгол арга хэрэглэж тараг баахан түрхсэн. Гэсэн ч бондгор хэвээрээ л байгаа.

 

Энэ зурган дээр бид 2-н уран бүтээлийн нэг хэсэг явж байна кк. Өөр олон гоё зураг байгаа л даа. Зөвлөхөд, байгальд зураг авхуулах ажлаа хуримын дараа хийх ёстойм байна лээ шүү. Би золтой л даашинзаа сүйрүүлчихээгүй. Хуримаас өмнө зураг авхуулая гэдэг санаа хэнээс ч гарсан юм байгаан. Буруутгах хүн олдохгүй байхыг бодоход надаас л гарсан санаа юм байлүй :p Зурагчин нь тэг ингэ, инээ, үнс, тэвэр гээд бүх үйлдлийг хэлээд өгдөг юм билээ. Гэхдээ ийм зураг авалтын нэг доголдолтой тал нь жоохон хиймэл болдог юм билээ. Жинхэнэ сэтгэлээсээ инээсэн инээмсэглэл, дэггүйтэл, аальгүйтэл байгаагүй. Бидний хувьд гэхдээ хуримын өмнө болохоор өөр сөнөө зовох асуудал байгаад байсан болохоор relax байж чадаагүй байх. Би л лав даашинзаа муухай болгочих вий гэж санаа зовоод аятайхан байж чадаагүй. Энэ зураг авалтанд манай нэг дүү дагаж явсан юм. Дүүгийнхээ апаратанд дэггүйтэж авхуулсан зурагнууд бас хөөрхөн байна лээ. Мэргэжлийн зурагчны апаратанд болохоор өнгө, дүрслэл, зохиомж гэж тасарцан зураг гардаг юм билээ. Тэгэхээр мэргэжлийн зураг авалтандаа өөрийн нэг хүнээ дагуулж яваад дэггүй зураг авхуулах хэрэгтэйм билээ.

 

За зурагнаас гадна өдөр хоног дөхөөд ирэхээр мартсан санасан ажил зөндөө гарч ирдэг юм байна. Ядаж л маникюр, педикюр гэх мэт хэрэгтэй, хэрэггүй баахан ажил гарч ирсэн. Зураг авалтанд явах гэж хувцас, үсний засалт, нүүр будалтаа туршиж үзсэн. Ингэх нь нэг талаар санаа оноогоо турших, алдаа мадагаа олох гээд тустай л юм билээ.

 

За за өөр хийсэн ажлууд санаанд орж ирэхгүй байнаа яг одоо. Хуримын дараа тухтай бичнээ. Би бас нэтээс олсон гоё санаануудыг хэрэгжүүлэх гэж байгаа. Бүтэлтэй болвол хуваалцанаа.

 



Хуримын бэлтгэл -13 буюу Эрэгтэй хувцас

Эрэгтэй хувцсандаа нээх анхаарал хандуулахгүй, сүйт бүсгүйн даашинз л гээд гүйгээд байсан чинь яг цагаа тулсан чинь эрэгтэй хувцас олдохгүй сандрах гэжийн шд. Манай сүйт залуу интернэтээс цагаан эмжээртэй хар хослол олж харчихаад тийм хослол хайгаад байсан чинь нөгөөх нь УБ-д байдаггүй ээ.Тэгээд ч ер нь menswear зардаг дэлгүүр ч ховор юм байна. УБ-н томоохон гэсэн хэдэн дэлгүүр дуусгаад хослол олдохгүйн биш биздээ гэж айж байлаа.

Бас сүйт бүсгүйн гоо сайхан л гээд яваад байсанаас биш сүйт залууг бас бодолцох хэрэгтэй юм байна лээ. Эрэгтэй хүн чинь гоо сайханд орохоороо өнгө ороод явчихаж байгаам чинь кк.

Хуримын сар эхэлж байгаа нь илт мэдэгдэж байлээ шүү. Хуримын холбогдолтой дэлгүүр, газрууд пиг хүнтэй байдаг болж. Дуучид, хөтлөгч хийх хүмүүс ч бараг олдохгүй. Олдохоороо аймаар үнэтэй байсан. Манай сүйт залуу өөрөө гараад хөтөлдөг юм уу гэж байлээ кк. Гэснээс нээрээ бид хоёр одоо болтол хуримын бүжигээ давтаагүй байгаа. Надад бүжиг зааж өгнө гэчихээд л зав гарахгүй яваад байгаа. Магтсан хүүхэн хуриман дээрээ яана гэдэг билээ тэрэн шиг бүжгийн талбай дээр даашинзандаа орооцолдож унаж эдр балрах вий дээ. Бас тэр гутал нь аймаар өндөр өсгийтэй. Тэрэн дээрээс унавал би лав хөлөө хугалах байхаа, түй түй түй :p

Ингэхэд хийх ажил их байхад блог бичээд сууж байна гэвэл манай сүйт залуу уурлах байх даа...  Маргааш хуримын хувцасаа турших буюу байгальд гарч зураг авхуулна гээд төлөвлөчихсөн байгаа. Догдолж эхэлж байна шүү кк.

Хуримын бэлтгэл -12 буюу Гоо сайхан

Хуриман дээр хамгаас хөөрхөн, хамгийн үзэсгэлэнтэй, бүх хүмүүсийн нүд тусч байх ёстой хүн бол сүйт бүсгүй байх ёстой гэж байгаам шд. Манай сүйт бүсгүйн гоо сайхан алдагдаад байнаа. Ажил ихтэй өөрийгөө харах завгүй гүйсээр байтал аягүй бол хуримынхаа өглөө нүд нь гархилчихсан босч ирэх нь. За гэхдээ хичээнээ, би чаднаа эдр кк. Ер нь бол сарын өмнөөс гоо сайханд бага багаар цаг зарцуулж эхлэх хэрэгтэйм байна гэж ойлгосон. Нүүрний массаж болон бүтэн биеийн массаж, саун энэ тэрд орчиход зүгээр шиг санагдсан.

Хуримын үс засалт дээр их хайлт хийж байгаа. Урт үстэй болохоор сүлжсэн загвар байвал зүгээр болов уу гээд үсчинтэйгээ ярилцаад байгаа. Нээрээ хуримын өдрийн үс засалт болон нүүр будалтаа хийлгэхийн тулд үсчин, будагчинтай яриад гэрт чинь очоод хийгээд өгөхөөр тохирвол зүгээр юм билээ. Тэгээд ч сүйт бүсгүйгээс гадна эгч, дүү нар гээд өөр үсээ янзлуулах хүмүүс гэр дүүрэн байна байх.

 

Хумсны будалт их чухал шүү, гэтэл би яг мартах гэжийлээ. Хиймэл хумс хийвэл нээх урт байх шаардлагагүй гэсэн. Гал голомт асаах гээд шүдэнз зурсан чинь хумс нь шатчихсан гээд хүмүүс аймаар юм яриад байна лээ. Тиймээс өөрийн хумсаа аятайхан арчилж ургуулж байгаад будаад орвол зүгээр байх.

 

Сүйт бүсгүйн цэцэг болон сүйт залуугийн энгэрийн цэцгийг Жарденд захиалж болох юм билээ. Уг нь хуримын заалны чимэглэлийн багц дотор багтсан байдаг юм билээ. Гэхдээ би заалны чимэглэлээсээ хасуулчихсан юм. Чимэглэл гэснээс машин чимэглэх гэж бас нэг ажил байна. Уг нь хуримын ордны багц дотор машин чимэглэл орсон байдаг ч би бас тэрийг нь хасуулчихсан. Гадуур чимэглэл хийдэг газрууд 100'000 төгрөгөөр 4 машин янзтай гоё чимэглээд өгдөг гэсэн.

 

Хуримын бэлтгэл -11 буюу Зурагчин

За 5 өдөр үлдлээ. Өдөр хоног дөхөх тусам сандрал улам нэмэгдээд байна. Хичнээн бусад хүнд ажил даалгаж өглөө ч гэсэн эцсийн эцэст бүх юман дээр энэ ямар байна гэж асуух юм. Гэхдээ бас арга ч үгүй байх л даа, таалагдахгүй юм хийчих вий гэж санаа зовж байгаа байх. Ингээд л жижиг сажиг юманд хутгалдаж явсаар байтал юу ч амжихгүй байгаа юм шиг санагдаад эхлэх юм.

Хамгийн чухал ажил бөгөөд мөнгө харамгүй төсөвлөх ёстой ажил бол хуримын зураг гэнэ дээ. Ер нь бол зураг л дурсгал болж үлдэнэ шүү дээ.  Олон жилийн дараа эмээ, өвөө нь ингээд хуримлаж байлаа гээд үр ачдаа зураг үзүүлж, түүх яриад сууж байвал аштай юу даа. Би эхлээд нь мэргэжлийн зурагчин авна гэж төлөвлөөгүй байсан боловч сүүлдээ авахаар шийдэж хуримын зурагчингийн эрэлд гарав аа. ФБ дээр Сайнжаргал гээд хуримын зураг дагнаж авдаг хүн байдаг юм байна. Түүний авсан зургуудыг үзсэн, их гоё юм билээ. Байгаль дээр гарч уран сайхны зураг авдаг юм байна лээ. Миний хувьд жиргээний найзын санал болгосон “Dual Zet” студиар зургаа авхуулахаар болсон. Тэднийх байгаль дээр гарч зураг авах, студчид уран сайхны зураг авах, хуримын өдөр зураг авах, хуримын өдөр бичлэг хийх, том хэмжээгээр угааж жаазлаж өгөх, албомь бэлдэж өгөх гэх мэт цогц үйлчилгээ үзүүлдэг нь таалагдсан. Студид авхуулах уран сайхны зураг нь давахгүй даваа шиг санагдаад байгаа юм даа. Яана даа.

 Хуримын дараа ганц үлдэх юм албомь, жаазтай зураг хоёр юм. Dual Zet студийнхан хуримын албомийг Солонгос руу явуулаад ном сэтгүүл шиг сайхан хийгээд өгдөг юм байна. Энэ албомь жоохон үнэтэй тусах байх гэхдээ нэг хийгээд авсан байхад нэг насны эд болно шүү дээ.

Заавал авхуулах ёстой хуримын зургууд гэсэн энэ нийтлэлээс ямар ямар зураг авхуулж болох талаар санаа авч болно. Бороотой үед ямар зураг авхуулж болох вэ гээд бас гоё гоё санаанууд байна лээ. Гадаадуудын зургууд нээх гоё энгийн бөгөөд аз жаргалтай харагдаад, Монголчуудын зурагнууд жоохон дүрд тоглосон юм шиг харагдаада байна лээ. Альфагийн энэ нийтлэл дээр бас хуримын зураг авхуулах pose талаар бичсэн байсан. Би өмнө нь эдгээр линкийг өгсөн ч байж магадгүй шүү, одоо мартсан бөлгөө кк.

Хүмүүсийн хийлгэсэн видео бичлэгийг үзээд, видео бичлэг заавал хийлгэх хэрэгтэй юм байна гэж бодсон. Тухайн өдрийн үйл явдал бүрийг бичиж үлдээнэ гэдгээрээ дурсамжтай.